2 րոպեի ընթերցում
ԳՅՈՒՄՐԻ, 19 ԴԵԿՏԵՄԲԵՐԻ, ԱՐՄԵՆՊՐԵՍ: Գյումրու գլխավոր տոնածառի լույսերը կվառվեն դեկտեմբերի 20-ին, ժամը 18:00-ին: Ինչպես «Արմենպրես»-ին տեղեկացրեց քաղաքապետարանի մամուլի խոսնակ Զոհրապ Եգանյանը, կենտրոնական հրապարակում տեղի կունենա նաեւ տոնական համերգ՝ գյումրեցի երգիչ-երգչուհիների, պարային խմբերի մասնակցությամբ, իսկ ավելի ուշ հրապարակ կգան նաև Ձմեռ պապն ու Ձյունանուշը: Քաղաքապետարանը գյումրեցիներին բազում անակնկալներ եւ շքեղ հրավառություն է խոստանում: Հրավառություն եւ երաժշտություն՝ ոչ կենդանի կատարմամբ, կլինի նաեւ Ամանորի գիշերը: Այս տարի «Վարդանանց» հրապարակում տեղադրված եղեւնու բարձրությունը 30 մետր է, եւ այն մի փոքր բարձր է անցած տարվա եղեւնուց: Ինչպես տեղեկացրին քաղաքապետարանի մշակույթի բաժնից՝ եղեւնին ամբողջությամբ հավաքվել է Շիրակի մարզի սոճիների սանիտարական էտի արդյուքնում կտրված ճյուղերից, եւ ոչ մի ծառ չի վնասվել: Գյումրու մշակույթի բաժնի պետ Արտաշես Կարապետյանի հավաստմամբ` Տոնածառի զարդարանքն այս տարի ամբողջովին փոխվել է` ավելի շքեղ եւ որակով: Նրա խոսքով` Գյումրու գլխավոր տոնածառը ոչ մի բանով չի զիջի հանրապետության գլխավոր տոնածառին: «Վստահեցնում եմ` Գյումրու տոնածառն ավելի շքեղ է: Բացի այդ, ամբողջովին նորացվել են կենտրոնական հրապարակի լույսերը, ձեւավորումը: Դեկտեմբերի 20-ին գյումրեցիներին հրապարակում հետաքրքիր անակնկալներ են սպասում՝ կառք, Ձմեռ պապ, Ձյունանուշ, տոնական համերգ, օդապարիկներ»,- նշեց Կարապետյանը:Ամանորի միջոցառումների, քաղաքի տոնական ձեւավորման, եղեւնու, ինչպես նաեւ տոնական նվերների եւ ամանորյա դրամական աջակցության համար քաղաքի ավագանին որոշել է տրամադրել 16 մլն դրամ: