Ադրբեջանի գործողությունները շարունակում են վնասել ԼՂ գործընթացին. Բրեդ Շերման
3 րոպեի ընթերցում
![Ադրբեջանի գործողությունները շարունակում են վնասել ԼՂ գործընթացին. Բրեդ Շերման](http://armenpress.am/resized/480/static/news/b/2013/12/744235.jpg)
ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: ԱՄՆ Ներկայացուցիչների պալատի անդամ Բրեդ Շերմանը դատապարտել է Արցախի հետ շփման գծում ադրբեջանական զինուժի կողմից հրադադարի խախտումը և հայ զինծառայող Հրանտ Պողոսյանի սպանությունը: «Ադրբեջանը կրկին ցույց տվեց, որ լուրջ չի մոտենում Հայաստանի և Արցախի հետ խաղաղ հարաբերությունների հաստատմանը: Չնայած Եվրոպայում անվտանգության և համագործակցության կազմակերպության (ԵԱՀԿ) Մինսկի խմբի շրջանակում Հայաստանի և Ադրբեջանի միջև բանակցությունների ընթացքում ներկայացված հրադադարի մասին պահանջին` ադրբեջանական զինուժը սպանել է հայ զինվոր Հրանտ Պողոսյանին: Հրաձգություն չի հրահրվել, և հայկական զինուժը հարգել է հրադադարի պահանջը»,-հայտարարել է կոնգրեսականը: Ինչպես «Արմենպրես»-ը տեղեկացավ կոնգրեսականի լրատվական ծառայութունից, Շերմանը նշել է, որԱդրբեջանի գործողությունները շարունակում են վնասել հակամարտության խաղաղ լուծման գործին:
Ադրբեջանի ագրեսիան դատապարտող հայտարարություն է արել նաև կոնգրեսական Ադամ Շիֆը: Երկու կոնգրեսականներն էլ իրենց հայտարարություններում անդրադարձել են մարդասպան Ռամիլ Սաֆարովին` նշելով, որ մարդասպանը, ինպես նաև Ադրբեջանի զինուժը պետք է պատասխանատվության ենթարկվեն իրենց գործողությունների համար:
«Ադրբեջանը և իր զինուժը պետք է պատասխանատվության ենթարկվեն Հայաստանի դեմ գործած իրենց վերջին ագրեսիայի և հակամարտության կարգավորման ԵԱՀԿ բանակցային գործընթացի նկատմամբ ցուցաբերած փոքր «հարգանքի» համար: Ես կշարունակեմ լինել Արցախի և Հայաստանի կողքին խաղաղության և անվտանգության իրենց շարունակական փնտրտուքներում»,- ավելացրել է Շերմանը:
Դեկտեմբերի 14-ին հակառակորդի կրակից զոհվել է պայմանագրային զինծառայող, շարքային Հրանտ Սերյոժայի Պողոսյանը: ՀՀ ՊՆ-ն արձանագրել է, որ դեկտեմբերի 14-ի միջադեպը, որի ժամանակ հակառակորդի կրակից պայմանագրային զինծառայող է զոհվել, հերթական անգամ ցույց է տալիս, որ ադրբեջանական կողմը, անտեսելով ԵԱՀԿ ՄԽ համանախագահների կոչերը, շարունակում է հրադադարի պահպանման անտեսման իր մշտական մոտեցումը, մասնավորապես, hամանախագահների` Բաքվում գտնվելու ժամանակ:Այս ամենի արդյունքում ՀՀ զինված ուժերի գործողությունները լինելու են կանխարգելիչ և խիստ: Իտալիայում ՀՀ արտակարգ և լիազոր դեսպան Սարգիս Ղազարյանին և Իտալիայի ԱԳ նախարար Էմմա Բոնինոյին հղած նամակում իտալա-արաբական «Ասսադակահ» կենտրոնի ղեկավարությունը ևս խստորեն դատապարտել է Ադրբեջանի ագրեսիան ազատ և ժողովրդավար Հայաստանի դեմ: