Ադամ Շիֆը դատապարտել է Ադրբեջանի կողմից հրադադարի խախտումները և հայ զինվորի սպանությունը
3 րոպեի ընթերցում
![Ադամ Շիֆը դատապարտել է Ադրբեջանի կողմից հրադադարի խախտումները և հայ զինվորի սպանությունը](http://armenpress.am/resized/480/static/news/b/2013/12/744172.jpg)
ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: ԱՄՆ կոնգրեսական Ադամ Շիֆն Ադրբեջանի ագրեսիան դատապարտող հայտարարություն է արել ադրբեջանական զինուժի կողմից հայ զինծառայող Հրանտ Պողոսյանի սպանության լուրն իմանալուց հետո: «Այսօր մենք իմացանք շփման գծում հայկական դիրքերի ուղղությամբ ադրբեջանական բանակի կրակոցների հետեւանքով սպանված մեկ այլ հայ զինվորի մասին: Ադրբեջանը և նրա զինուժը պետք է պատասխանատվություն կրեն, և ոչ ոք չի կարող ժխտել, որ այս վայրենությունը ղեկավարվում է Ադրբեջանի անվտանգության ամենաբարձր մակարդակների կողմից»,- ինչպես հաղորդում է «Արմենպրես»-ը`վկայակոչելով կոնգրեսականի լրատվական ծառայության հաղորդագրությունը, մասնավորապես հայտարարել է Շիֆը:
Նա անդրադարձել է նաև տխրահռչակ Ռամիլ Սաֆարովին` նշելով, որ սրտխառնուք առաջացնող բեմադրությունից հետո, որով ադրբեջանցիները դիմավորեցին հայ զինվորին քնած ժամանակ կացնահարած մարդասպանին, արդեն իսկ պարզ է, թե ինչպես է Ադրբեջանի կառավարությունը փառավորում այդ բռնությունը: «Բանտարկելու փոխարեն` Սաֆարովին շքերթով տարել են փողոցներով, նոր տուն տվել և բարձրացրել պաշտոնը: Բաքվի ամենավերջին մարդասպանը չի կանգնի արդարատատության առաջ, քանի դեռ միջազգային հանրությունը չպահանջի վերջ տալ այս վայրագություններին»,- ամփոփել է Շիֆը:
Դեկտեմբերի 14-ին հակառակորդի կրակից զոհվել է պայմանագրային զինծառայող, շարքային Հրանտ Սերյոժայի Պողոսյանը: ՀՀ ՊՆ-ն արձանագրել է, որ դեկտեմբերի 14-ի միջադեպը, որի ժամանակ հակառակորդի կրակից պայմանագրային զինծառայող է զոհվել, հերթական անգամ ցույց է տալիս, որ ադրբեջանական կողմը, անտեսելով ԵԱՀԿ ՄԽ համանախագահների կոչերը, շարունակում է հրադադարի պահպանման անտեսման իր մշտական մոտեցումը, մասնավորապես, hամանախագահների` Բաքվում գտնվելու ժամանակ:Այս ամենի արդյունքում ՀՀ զինված ուժերի գործողությունները լինելու են կանխարգելիչ և խիստ:
Իտալիայում ՀՀ արտակարգ և լիազոր դեսպան Սարգիս Ղազարյանին և Իտալիայի ԱԳ նախարար Էմմա Բոնինոյին հղած նամակում իտալա-արաբական «Ասսադակահ» կենտրոնի ղեկավարությունը ևս խստորեն դատապարտել է Ադրբեջանի ագրեսիան ազատ և ժողովրդավար Հայաստանի դեմ: