Դավութօղլուն հայերին եւ թուրքերին «պատմական համախմբման» կոչ է անում
2 րոպեի ընթերցում
![Դավութօղլուն հայերին եւ թուրքերին «պատմական համախմբման» կոչ է անում](http://armenpress.am/resized/480/static/news/b/2013/12/742937.jpg)
ԵՐԵՎԱՆ, 7 ԴԵԿՏԵՄԲԵՐԻ, ԱՐՄԵՆՊՐԵՍ: Դեկտեմբերի 12-ին տեղի ունենալիք Սեւծովյան տնտեսական համագործակցության երկրների արտգործնախարարների համաժողովին մասնակցելու համար Երեւան այցելելու նախօրեին Թուրքիայի արտաքին գործերի նախարար Ահմեդ Դավութօղլուն, HaberTurk հեռուստաալիքին տված հարցազրույցում անդրադառնալով հայ-թուրքական հարաբերությունների նորմալացման հարցին, ասել է, թե Հայաստանի հետ Թուրքիայի հարաբերությունները կարող են անշեղորեն առաջ ընթանալ այն ժամանակ, երբ հայերն ու թուրքերը «գնան պատմական համախմբման ճանապարհով»:
Ինչպես հաղորդում է «Արմենպրես»-ը, Դավութօղլուն նշել է, որ եթե անգամ Հայաստանի հետ անբասիր հարաբերություններ հաստատվեն, իսկ Հարավային Կովկասում խաղաղության միջավայր ապահովված չլինի, միեւնույն է, դա խարխուլ կլինի եւ կարող է ամեն պահի կործանվել: Նրա կարծիքով` «իսկական խաղաղություն կտիրի այն ժամանակ, երբ հայերն ու թուրքերը գնան պատմական համախմբման ուղիով եւ ազատորեն բացեն սրտներն իրար առաջ»:
Դավութօղլուն շեշտել է, որ վերջին շրջանում Թուրքիան Ադրբեջանի հետ գործում է Վրաստանի, Իրանի եւ Թուրքմենստանի հետ քառակողմ մեխանիզմների մշակման, Ռուսաստանի հետ հարաբերությունների էլ ավելի բարելավման ճանապարհով եւ «այդ շղթայում միակ բացակայող օղակը Հայաստանն է»: «Մենք այդօրինակ մեկուսացում չենք ցանկանում: Եթե Հայաստանն ուզում է դուրս գալ այդ մեկուսացումից, ապա պետք է հարգանք ցուցաբերի Ադրբեջանի տարածքային ամբողջականության նկատմամբ», -ասել է նա: