Ռուսաստանն ավարտել է Գաբալայի ՌՏԿ գույքն Ադրբեջանին հանձնելու գործընթացը
1 րոպեի ընթերցում
![Ռուսաստանն ավարտել է Գաբալայի ՌՏԿ գույքն Ադրբեջանին հանձնելու գործընթացը](http://armenpress.am/resized/480/static/news/b/2013/10/735544.jpg)
ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: Ռուսաստանը վերջնականապես ավարտել է Գաբալայի ռադիոտեղորոշիչ կայանի անշարժ գույքը Ադրբեջանին հանձնելու գործընթացը: Ինչպես հաղորդում է «Արմենպրես»-ը` վկայակոչելով ադրբեջանական APA գործակալությունը, այս մասին հայտարարել է Ադրբեջանի օդային ուժերի հրամանատար, գեներալ-մայոր Ալթայ Մեհդիևը:
Նա հայտնել է, որ ռադիոտեղեորոշիչ կայանում այլևս չկան ռուս զինծառայողներ, քանի որ վերջիններս իրենց ընտանիքիների հետ արդեն լքել են Ադրբեջանը: «Կայանն ամբողջությամբ գտնվում է Ադրբեջանի վերահսկողության տակ»,- ասել է Մեհդիևը:
Գաբալայի ՌՏԿ-ն կառուցվել էր խորհրդային տարիներին` որպես ԽՍՀՄ հակահրթիռային պաշտպանության կարևոր տարր: ԽՍՀՄ փլուզումից հետո Ռուսաստանը շարունակում էր ռադիոտեղորոշիչ կայանի շահագործումը:
2012 դեկտեմբերի 10-ին Ադրբեջանի ԱԳ նախարարությունը հայտարարել էր Ռուսաստանի կողմից Գաբալայի ռադիոտեղորոշիչ կայանի շահագործումը դադարեցնելու նպատակահարմարության մասին: Տեղեկատվության մեջ ընդգծվում էր, որ Բաքվի և Մոսկվայի միջև անցկացվել են ինտենսիվ բանակցություններ Գաբալայի ռադիոտեղորոշման կայանի շուրջ, սակայն դրանց արդյունքում կողմերին չի հաջողվել համաձայնության գալ վարձակալության գնի հարցում: