ԵԱՀԿ ներկայացուցիչը խստորեն դատապարտել է Ադրբեջանում լրագրողների դեմ հարձակումը
2 րոպեի ընթերցում
![ԵԱՀԿ ներկայացուցիչը խստորեն դատապարտել է Ադրբեջանում լրագրողների դեմ հարձակումը](http://armenpress.am/resized/480/static/news/b/2013/10/735530.jpg)
ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ: ԵԱՀԿ մամուլի ազատության հարցերով ներկայացուցիչ Դունյա Միյատովիչը խստորեն դատապարտել է հոկտեմբերի 4-ին Ադրբեջանում լրագրողների դեմ գրանցված հարձակումը: Ինչպես «Արմենպրես»-ին տեղեկացրին ԵԱՀԿ մամլո ծառայությունից, Միյատովիչը միաժամանակ կոչ է արել արագորեն իրականացնել հանցագործությունների հետաքննություն:
«Ես խստորեն դատապարտում է այսօր լրագրողների դեմ տեղի ունեցած հարձակումները: Լրագրողների դեմ բռնությունները շարունակում են վտանգել մամուլի ազատությունն Ադրբեջանում: Ցանկացած բռնություն լրագրողների դեմ անընդունելի է և պետք է դիտարկել որպես հարձակում ողջ հասարակության նկատմամբ»,- շեշտել է ԵԱՀԿ ներկայացուցիչը:
Ադրբեջանական ԶԼՄ-ների փոխանցմամբ` մի խումբ լրագրողներ, որոնց թվում են եղել «Թուրան» գործակալության լրագրող Էթիմադ Բուդաղովը, Ռոյա Ռաֆիևան «Ենի Մուսավաթից» և «Ազադլըգից» Ռամին Դեկոն և Սեվինչ Վագըգըզըն ֆիզիկական հարձակման են ենթարկվել Սաբիրաբադ շրջանում նախագահական ընտրությունների քարոզչական միջոցառում լուսաբանելու ընթացքում: Հարձակումը տեղի է ունեցել իրավապահների ներկայությամբ, ովքեր ակնհայտորեն չեն միջամտել ծեծը կանխելու նպատակով: Որոշ լրագրողներ լուրջ մարմնական վնասվածներ են ստացել, վնասվել է նրանց տեսաձայնագրող սարքերը:
«Հատկապես անընդունելի է, որ հարձակումը տեղի է ունեցել ոստիկանության աշխատակիցների ներկայությամբ, ովքեր պատասխանատու են լրագրողների օժանդակելու և պաշտպանելու համար: Ես կոչ եմ անում իշխանություններին անմիջապես գործի հետաքննություն իրականացնել, հարձակվողներին պատասխանատվության ենթարկել և ջանքեր գործադրել լրատվական ոլորտի աշխատակիցների անվտանգության ապահովման համար»,- շեշտել է Միյատովիչը: