1 րոպեի ընթերցում
ԻՋԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: Տավուշի մարզում սեպտեմբերի 17-ից սկսվել են խաղողի մթերման աշխատանքները: 2013 թվականին կանխատեսվում է մթերել շուրջ 8100 տոննա խաղող` նախորդ տարվա 7486 տոննայի դիմաց: Ինչպես «Արմենպրես»-ին տեղեկացրին Տավուշի մարզպետարանից, ընթացիկ տարում մթերման աշխատանքներն առաջինը սկսել է ընդունել Երևանի կոնյակի գործարանի Բերդի մասնաճյուղը, որը, վերջին տվյալներով, ընդունել է 2900 տոննա խաղող: 2012 թվականին գործարանի կողմից պայմանագրային կարգով մթերվել է 3000 տոննա խաղող: Այս տարի կանխատեսվում է շուրջ 4000 տոննա:
Խաղողի մթերման աշխատանքներն սկսել է նաև «Երևանի շամպայն-գինիների գործարան» ԲԲԸ-ի Դեբեդավանի գինու գործարանը, որն արդեն ընդունել է մոտ 1000 տոննա բերք: Իսկ Տավուշի գինու և Իջևանի գինու-կոնյակի գործարանները համապատասխանաբար մթերել են 220 և 350 տոննա խաղող: Բերդավանի գինու գործարանը մթերման աշխատանքները սկսում է այսօրվանից՝ սեպտեմբերի 30-ից: Բացի Տավուշի գինու գործարանից, մյուս բոլոր մթերող կազմակերպությունները նախորդ տարվա 130 դրամի փոխարեն այս տարի խաղողն ընդունում են 135 դրամով: