ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: Բանասիրական գիտությունների թեկնածու, Կիևի Տարաս Շևչենկոյի անվան ազգային համալսարանի լրագրության ինստիտուտի պրոֆեսոր Նիկիտա Վասիլենկոն իր լիակատար աջակցությունն է հայտնել Ուկրաինայի Գերագույն Ռադայի կողմից Հայոց ցեղասպանության ճանաչման նախաձեռնությանը: Ինչպես հաղորդում է «Արմենպրես»-ը` Analitika.at.ua-ին տված հարցազրույցում պրոֆեսորը նշել է, որ Հայոց ցեղասպանության ճանաչումն անհրաժեշտ է յուրաքանչյուր քաղաքակիրթ պետության համար: «Իմ խորին համոզմամբ` Հայոց ցեղասպանության ճանաչումն անհրաժեշտ է,քանի որ այդ փաստը հաստատվել է բազմաթիվ միջազգային կազմակերպությունների կողմից, դարձել փաստաթուղթ ու հաստատվել ողբերգության ականատեսների կողմից»,- ասել է նա:
1915 թվականին Օսմանյան կայսրությունում տեղի ունեցած Հայոց ցեղասպանության ճանաչման օրինագիծն Ուկրաինայի Գերագույն Ռադայում գրանցվել է հունիսի 6-ին: Նախագծի հեղինակներն են` պատգամավորներ Վիլեն Շատվորյանը` Ռեգիոնների խմբակցությունից, և Արսեն Ավակովը` «Բատկիվշինա»-ից:
Ուկրաինացի խորհրդարանականների նախաձեռննությանն իր աջակցությունն է հայտնել նաև ՀՀ արտաքին գործերի նախարարությունը: Միաժամանակ, նախաձեռնության հեղինակները, ուկրաինական մտավորականության ներկայացուցիչները, փորձագետներն ու հասարակական կազմակերպություններն ակտիվորեն հանդես են գալիս հայտարարություններով` կոչ անելով Ռադայի խմբակցություններին ճանաչել Հայոց ցեղասպանության փաստը:
ՄԱԿ-ի Մարդու իրավունքների ենթահանձնաժողովը 1987թ. ճանաչել էր Օսմանյան կայսրությունում հայերի ցեղասպանությունը։ Նույն թվականին Եվրոպական խորհրդարանը 1915-1922 թթ. դեպքերը ցեղասպանություն որակելու որոշում էր կայացրել։ Հայոց ցեղասպանությունը պաշտոնապես ճանաչել են Կանադան, Ռուսաստանը, Ֆրանսիան, Իտալիան, Շվեյցարիան, Շվեդիան, Հունաստանը, Լեհաստանը, Լիտվան, Չիլին, Սլովակիան, Ուրուգվայը, Արգենտինան, Վենեսուելան, Նիդեռլանդները, Բելգիան, Վատիկանը, Լիբանանը, Կիպրոսը, ԱՄՆ-ի նահանգների մեծ մասը։