1 րոպեի ընթերցում
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: Հայաստանի պետական ֆիլհարմոնիկ նվագախումբը 1915 թվականի Հայոց մեծ եղեռնի զոհերի հիշատակին հարգանքի տուրք կմատուցի համերգով: Ապրիլի 24-ին Արամ Խաչատրյանի անվան համերգասրահում կներկայացվի հայտնի կոմպոզիտոր Տիգրան Մանսուրյանի «Ռեքվիեմ»-ը եւ «Ասացվածք հոր համար» ակապելլան:
Ինչպես «Արմենպրես»-ին տեղեկացրին Ֆիլհարմոնիկ նվագախմբի մամուլի ծառայությունից, համերգին կմասնակցեն Հայաստանի երեք առաջատար՝ Հայաստանի պետական կամերային (գեղ. ղեկավար եւ գլխ. խմբավար Ռոբերտ Մլքեյան), Երեւանի պետական կամերային (գեղ. ղեկավար եւ գլխ. խմբավար Հարություն Թոփիկյան) եւ «Հովեր» պետական կամերային (գեղ. ղեկավար եւ գլխ. խմբավար Սոնա Հովհաննիսյան) երգչախմբերը: Մենակատարները կլինեն Հասմիկ Թորոսյանը (սոպրանո), Դավիթ Բաբայանցը (բարիտոն):
Դիրիժորներն ենՌոբերտ Մլքեյանը եւ Էդուարդ Թոփչյանը: