Արազ Օզբիլիսը ճանաչվել է Ռուսաստանի առաջնության 22-րդ տուրի լավագույն աջ կիսապաշտպան

ԵՐԵՎԱՆ, 4 ԱՊՐԻԼԻ, ԱՐՄԵՆՊՐԵՍ: Ռուսաստանի առաջնության 22 տուրերի արդյունքներով Կրասնոդարի «Կուբան»-ի եւ Հայաստանի ազգային հավաքականի կիսապաշտպան Արազ Օզբիլիսը ճանաչվել է ռուսական պրեմիեր լիգայի լավագույն աջ կիսապաշտպան:

Ինչպես տեղեկացնում է «Արմենպրես»-ը՝ վկայակոչելով Sovsport-ը, Հայաստանի հավաքականի ֆուտբոլիստը 4,19 միավորով (5 միավորանոց համակարգով) առաջատար է իր դիրքում և գերազանցում է ԲԿՄԱ-ի ֆուտբոլիստ Կեյսուկե Հոնդային ու Մոսկվայի «Սպարտակ»-ի կիսապաշտպան Էյդեն Մաքգիդիին: Ավելացնենք, որ «Սպարտակ»-ի եւ Հայաստանի ազգային հավաքականի հարձակվող Յուրա Մովսիսյանի անունը չկա լավագույնների թվում:

Արազ Օզբիլիսը«Կուբան» է տեղափոխվել հոլանդական«Այաքս»-ից: Կրասնոդարյան ակումբի կազմում տարբեր մրցաշարերում նա անցկացրել է 19 հանդիպում` դառնալով 9 գոլի եւ 4 գոլային փոխանցման հեղինակ: 22-րդ տուրում նե գեղեցիկ հեռահար հարվածով գրավեց Մոսկվայի«Սպարտակ»-ի դարպասը՝ հավասարեցնելով խաղի հաշիվը: