Հայաստանի օլիմպիական հավաքականը հյուրընկալվել էր ԿԳՄՍՆ-ում

ԵՐԵՎԱՆ, 19 ՀՈՒԼԻՍԻ,ԱՐՄԵՆՊՐԵՍ: Հայաստանի կրթության, գիտության, մշակույթի և սպորտի նախարար Ժաննա Անդրեասյանը և նախարարի տեղակալ Կարեն Գիլոյանը հյուրընկալեցին Հայաստանի օլիմպիական հավաքականին:

«Արմենպրես»-ի հաղորդմամբ` Ժաննա Անդրեասյանը հաջողություն մաղթեց հավաքականի յուրաքանչյուր ներկայացուցչի:

«Մեծ հավատով ենք սպասում ձեր մրցելույթներին: Ձեր և ձեր մարզիչների կատարած աշխատանքը հսկայական է, և պետությունը գնահատում է այդ աշխատանքը: Լիահույս եմ, որ Օլիմպիական խաղերից հետո ևս մեկ անգամ հանդիպելու հնարավորություն կունենանք:  Պետությունը ձեր կողքին է»,-ասաց նախարարը:

ԿԳՄՍ նախարարի տեղակալ Կարեն Գիլոյանը հաջողություն մաղթեց մարզիկներին` մեդալային մեծ սպասելիքներ ունենալով ամբողջ թիմից: Գիլոյանը նաև մարզիկներին հրավիրեց «Հայաստանի տուն», որը կգործի Փարիզի կենտրոնում` 118 Rue, Courcelles 75017, Paris հասցեում:

«Երբևէ Օլիմպիական խաղերի մասնակցած ամենահզոր թիմն է մեկնում Փարիզ: Մրցասպարեզում միայն դուք չեք` ամբողջ երկիրն է ձեզ հետ: Այնպես արեք, որ հետո իրար շնորհավորելու շատ առիթներ ունենանք»,-ընդգծեց Գիլոյանը:

Հայաստանը Փարիզի 33-րդ ամառային Օլիմպիական խաղերին կունենա 15 մասնակից` հրաձիգ Էլմիրա Կարապետյանը, մարմնամարզիկներ Արթուր Դավթյանը (հենացատկ), Վահագն Դավթյանը (օղակներ), ըմբիշներ Սլավիկ Գալստյանը (հունահռոմեական ոճ, 67 կգ), Մալխաս Ամոյանը (հունահռոմեական ոճ, 77 կգ), Արթուր Ալեքսանյանը (հունահռոմեական ոճ, 97 կգ), Արսեն Հարությունյանը (ազատ ոճ, 57 կգ), Վազգեն Թևանյանը (ազատ ոճ, 65 կգ), ծանրորդներ Անդրանիկ Կարապետյանը (89 կգ), Գարիկ Կարապետյանը (102 կգ), Վարազդատ Լալայանը (+102 կգ),  բռնցքամարտիկ Դավիթ Չալոյանը (+92 կգ), լողորդներ Արթուր Բարսեղյանը և Վարսենիկ Մանուչարյանը, աթլետ Երվանդ Մկրտչյանը: