2 րոպեի ընթերցում
ԵՐԵՎԱՆ, 4 ԱՊՐԻԼԻ, ԱՐՄԵՆՊՐԵՍ: «Հովհաննես Իմաստասեր Կաթողիկոս Օձնեցի» բարեգործական հիմնադրամը, Հայաստանի գրողների եւ նկարիչների միությունները ապրիլի 4-ին համաձայնագիր ստորագրեցին: Եռակողմ համաձայնագիրը ենթադրում է, որ կողմերը պարտավորվելու են Հայաստանի պատմամշակութային ժառանգության պահպանման, ամրակայման եւ վերականգնման համար իրենց ներդրումն ու աջակցությունը ցուցաբերել: «Արմենպրես»-ի փոխանցմամբ` ՀԳՄ նախագահ Լեւոն Անանյանը նշեց, որ ողջունում է այս նախաձեռնությունը, որը միտված է հոգեւոր ժառանգության պահպանմանը:
«Անհրաժեշտ է հասարակության տարբեր շերտերին մշակութամերժ հասարակությունից դարձնել մշակութակենտրոն»,- ասաց Անանյանը: Նրա խոսքով` համաձայնագրի կնքումը ապացուցում է, որ ստեղծագործական միությունները պատրաստ են նպաստել հոգեւոր կապերի ամրացմանը` ակտիվ գործունեություն իրականացնելով:
Անանյանը հույս հայտնեց, որ այս նախաձեռնության մեկնարկն ու շարունակությունը կստեղծի համապատասխան մշակույթային մթնոլորտ:
«Համաձայնագրի իմաստը հոգեւոր արժեքներ վերականգնելու մեջ է»,- ասաց «Հովհաննես Իմաստասեր Կաթողիկոս Օձնեցի» բարեգործական հիմնադրամի գործադիր տնօրեն Վանուշ Շերմազանյանը:
«Մենք միշտ փորձել ենք մասնակից լինել մեր հնարավորությունների սահմաններում տարբեր կարեւոր նախաձեռնություններին»,- նշեց Նկարիչների միության նախագահ Կարեն Աղամյանը:
«Հովհաննես Իմաստասեր Կաթողիկոս Օձնեցի» հիմնադրամի նպատակն է Հայաստանի տարածքում գտնվող պատմաճարտարապետական գլուխգործոցների վերականգնումը ՀՀ մշակույթի նախարարության նախագծերով եւ վերահսկմամբ, ինչպես նաև Հայ Առաքելական եկեղեցու համաձայնությամբ:
«Հովհաննես Իմաստասեր Կաթողիկոս Օձնեցի» բարեգործական հիմնադրամի կանոնադրությունն Իրավաբանական անձանց պետական ռեգիստրի կողմից գրանցվել է 2011 թվականի ապրիլի 26-ին:
Հիմնադրամը ստեղծվել է այժմ Ռուսաստանում բնակվող գործարար, ծագումով Օձնեցի Մովսես Ձավարյանի նախաձեռնությամբ: