1 րոպեի ընթերցում
ԳԱՎԱՌ, 5 ՄԱՐՏԻ, ԱՐՄԵՆՊՐԵՍ: Սելիմի լեռնանցքում ձյան կապանքներում հայտնված բոլոր ավտոմեքենաներն ու ուղեւորները դուրս են բերվել մարտի 5-ի առավոտյան: Մարտի 4-ի երեկոյան լեռնանցքի Մարտունի-Գետափ միջպետական ճանապարհահատվածում ձնաբքի պատճառով արգելափակվել էին 7 ավտոմեքենաներ` 30 ուղեւորով: Ինչպես «Արմենպրես»-ին տեղեկացրեց Գեղարքունիքի մարզի փրկարար ծառայության պետ Մարտին Բարսեղյանը, արգելափակումից նրանց դուրս բերելու համար մարզի փրկարարները եւ ճանապարհաշինարարներն աշխատել են ողջ գիշերվա ընթացքում: Մեքենաները հիմնականում խցանված են եղել Յանղ բնակավայրի կողքին, որտեղ անասնապահ ընտանիքները բնակվում են միայն ամռանն ու աշնանը: Արգելափակված մեքենաների ուղեւորները գիշերվա ցրտից ու բքից պաշտպանվել են պահեստավորած աթարը թոնրի մեջ վառելով: Փրկարարները միայն առավոտյան ժամը 9-ի դրությամբ են կարողացել հաղթահարել ձյան արգելքը:
Սելիմի լեռնանցքը չընդմիջվող բքերի պատճառով դեռ փակ է: Փակվել է նաեւ Սոթք-Քարվաճառ ճանապարհը: Մարզի մնացած ճանապարհները բաց են եւ երթեւեկելի: