2 րոպեի ընթերցում
ԳՅՈՒՄՐԻ, 13 ՓԵՏՐՎԱՐԻ, ԱՐՄԵՆՊՐԵՍ: Գյումրին փետրվարի 13-ին հյուրընկալել էր ՀՀ նախագահի թեկնածու Պարույր Հայրիկյանին: Վարդան Աճեմյանի անվան պետական դրամատիկական թատրոնում կայացած հանդիպման ժամանակ թեկնածուն նշեց, որ Գյումրիի այցն «իր իրական քարոզարշավի առաջին օրն է»: ԱԻՄ առաջնորդը նախ բերեց այն բնորոշումը, ինչով այս ընտրություններն առանձնացվում են նախորդից եւ ինչը պատճառ դարձավ ընտրություններին իր մասնակցելու համար: «Փաստը մնում է փաստ, որ խոսքի ազատություն կա, եւ քանի որ մենք շատ կարեւոր անելիքներ ունենք, որոշեցի մասնակցել այս ընտրություններին»,- նշեց թեկնածուն:
«Արմենպրես»-ի հաղորդմամբ` հանդիպման ժամանակ Հայրիկյանը գյումրեցի ընտրողներին ներկայացրեց ծրագրային կարեւորություն ներկայացնող որոշ հարցեր՝ հիմնականում սահմանադրական եւ դատական համակարգերի փոփոխությունների մասով: «Այս ընթացքում ընտրողները խոստումներ շատ են լսել, բայց ամենակարեւորն այն է, որ թեկնածուն հասկանա, թե ինչ է հարկավոր ժողովրդին: «Պետականությունն ինչ-որ չափով վերականգնել ենք, բայց քիչ է արդարության զգացումը: Վերջին տասնամյակներում ես մշակել եմ կատարյալ ժողովրդավարական պետության մոդելը: Դա հայաստանյան մեծ թվով կուսակցությունների կողմից ընդունվել է որպես օրինակելի մի երեւույթ, ես փորձել եմ նույնիսկ դա մատուցել իշխանություններին: Իմ հիմնական նպատակը ոչ թե այն է, որ ես ինչ որ բան խոստանամ, եւ դուք այդ խոստումը համարեք հնարավոր, այլ խոստանամ, որ իմ օգնությամբ դուք կստանաք մի լծակ, որի օգնությամբ դուք հետագայում կկարողանաք ցանկալի ձեւով կերտել ձեր կյանքը՝ կատարյալ ժողովրդավարության համակարգի միջոցով»,- նշեց թեկնածուն: Պարույր Հայրիկյանը նաեւ անդրադարձավ աղետի գոտու հիմնախնդրին` նշելով, որ անցյալի ողբերգական էջը փակելը բոլորի խնդիրն է: «Ես տեսնում եմ, որ Գյումրիում ինչ-որ բան տեղից շարժվում , բայց սա դեռ քիչ է, պետք է ավելին անել «,- ավելացրեց թեկնածուն:
Հայաստանում Նխագահի ընտրությունը տեղի կունենա փետրվարի 18-ին: Նախագահի պաշտոնի համար կպայքարեն յոթ թեկնածուներ: