Շիրակի գյուղական համայնքների անօթեւան 40 ընտանիք ՀՀ կառավարությունից 3 մլն դրամ աջակցություն ստացավ
2 րոպեի ընթերցում
ԳՅՈՒՄՐԻ, 29 ՀՈՒՆՎԱՐԻ, ԱՐՄԵՆՊՐԵՍ: Շիրակի մարզի գյուղական համայնքների այն անօթեւան ընտանիքները, որոնք բաղկացած են 1 կամ 2 անձից եւ 1 սենյականոց բնակարանի շահառու են՝ ՀՀ կառավարությունից ստացել են բնակարանի փոխհատուցման գումարներ:
Շահառուների ընտրությունը ՀՀ քաղաքաշինության նախարարությունն իրականացրել է Շիրակի մարզի գյուղական համայանքների անօթեւան ընտանիքների ցուցակից: Մարզում մինչ այս անօթեւան համարվում էր 264 ընտանիք: Նրանցից ընտրված 1 սենյականոց բնակարանի շահառու ճանաչված 40 ընտանիքի տրամադրվել է 3 մլն դրամ պետական աջակցություն՝ բնակարանային պայմանների բարելավման նպատակով: Ինչպես «Արմենպրես»-ի թղթակցին տեղեկացրեց Շիրակի մարզպետարանի աշխատակազմի քաղաքաշինության վարչության բնակարանների ենթակառուցվածքների գործունեության բաժնի պետ Տիգրան Հարությունյանը, շահառուների հետ պայմանագրերը կնքված են, իսկ գումարները փոխանցված:
Ի տարբերություն նախորդ փոխհատուցման ծրագրերի` այս մեկը չի պահանջում պարտադիր բնակարանի գնում, փոխարենը շահառուն ստորագրում է պայմանագիր, համաձայն որի` պետությունից այլեւս բնակարանի պահանջ չունի: Ի դեպ, Շիրակի մարզպետարանի ներկայացրած տվյալներով` մարզում գյուղական համայանքների 1 սենյականոց բնակարանի անթեւան ընտանքիների թիվը 57 է: «ՀՀ քաղաքաշինության նախարարության հաստատած 40 ընտանիքները պայմանագիր կնքել են բնակարանի փոխհատուցման գումար ստանալու համար: Մնում է 17 ընտանիքի խնդիրը լուծել: Նրանց մասով ՀՀ քաղաքաշինության նախարարությունը պարտավորություն է վերցրել երկու օրվա ընթացքում ներկայացնել 17 ընտանիքի փոխհատուցման գումար չտալու որոշման պատճառները»,-նշեց Հարությունյանը: