1 րոպեի ընթերցում
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Կրասնոդարի «Կուբան»-ի եւ Հայաստանի ազգային հավաքականի կիսապաշտպան Արազ Օզբիլիսի կարծիքով` իր ակումբն արժանիորեն է զբաղեցնում մրցաշարային աղյուսակի 4-րդ հորիզոնականը: Ինչպես տեղեկացնում է«Արմենպրես»-ը`վկայակոչելով ռուսական championat-ը, Օզբիլիսն ասել է, որ «Կուբան»-ը բավականին ուժեղ թիմ է եւ բոլոր նախադրյալներն ունի չորրորդ հորիզոնականը զբաղեցնելու համար:
«Մենք ունենք համակարգված խաղ եւ ուժեղ ֆուտբոլիստներ եւ կարող ենք մեզ թույլ տալ պայքարել բարձր տեղերի համար: Մենք ցանկանում ենք խաղալ եվրագավաթներում: Համաձայն եմ, որ Ռուսաստանում շատ են ուժեղ ակումբները, սակայն առաջնության առաջին հատվածից հետո մեր գրանցած արդյունքից երեւում է, որ մենք նրանց շատ չենք զիջում: Մենք կարող ենք հաղթել ցանկացած մրցակցի, եւ հենց սրանով էլ հետաքրքիր է Ռուսաստանի առաջնությունը»,- նշել է Օզբիլիսը:
Արազ Օզբիլիսը «Կուբան» է տեղափոխվել հոլանդական «Այաքս»-ից 2012թ: Ռուսական ակումբի կազմում նա մասնակցել է Ռուսաստանի առաջնության 14 հանդիպման՝ դառնալով 7 գոլի հեղինակ: