1 րոպեի ընթերցում
ԵՐԵՎԱՆ, 15 ՀՈՒՆՎԱՐ, ԱՐՄԵՆՊՐԵՍ: Անգլիական պրեմիեր լիգայի հանդիպումները սպասարկող բոլոր մարզադաշտերը սանիտարական ստուգումներ են անցել: Ինչպես հաղորդում է «Արմենպրես»-ը` վկայակոչելով Daily star-ը, ստուգումների արդյունքում «Մանչեսթեր Յունայթեդ» ակումբին պատկանող «Օլդ Թրաֆորդ» մարզադաշտում մեծ քանակությամբ առնետներ են հայտնաբերվել:
Անթերի չի եղել նաեւ «Չելսի»-ին պատկանող «Սթեմֆորդ Բրիջ» մարզադաշտը: Պարզվել է` այնտեղ հանդիպումներից մեկի ժամանակ երկրպագուներին հնդկահավ են վաճառել, որի պիտանելիության ժամկետը սպառված է եղել:
Նշվում է, որ լավագույն արդյունքները գրանցվել են «Էվերթոն»-ի, «Արսենալ»-ի , «Լիվերպուլ»-ի, «Վեսթ Բրոմվիչ»-ի եւ «Սանդեռլենդ»-ի մարզադաշտերում:
Անգլիական պրեմիեր լիգայի ընթացիկ մրցաշրջանի բացահայտ առաջատարը 55 միավորով «Մանչեսթեր Յունայթեդ»-ն է: Երկրորդ հորիզոնականում Մանչեսթերյան մյուս ակումբն է՝ «Մանչեսթեր Սիթի»-ն, որն իր ակտիվում ունի 48 միավոր: 41 միավորով լավագույն եռյակը եզրափակում է Լոնդոնի «Չելսի»-ն: