2 րոպեի ընթերցում
ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Կարսի Տասներկու Առաքյալների հայկական եկեղեցին իր պատմական կառուցվածքի եւ ճարտարապետության առանձնահատկությամբ գրավում է տեղացի եւ արտասահմանցի զբոսաշրջիկների ուշադրությունը: Այս մասին, ինչպես հաղորդում է «Արմենպրես»-ը, «Անատոլու» լրատվական գործակալության թղթակցի հետ զրույցում հայտնել է Կարսի մշակույթի եւ զբոսաշրջության տնօրեն Հաքան Դողանայը: Թուրք պաշտոնյան չի կարողացել չխոստովանել, որ Կարսում զբոսաշրջիկներին հետաքրքրող շինությունների մեծ մասը հայկական են:
Նա նշել է, որ 10-րդ դարում` Բագրատունիների հայկական թագավորության ժամանակաշրջանում, Աբաս թագավորի կողմից կառուցված Տասներկու Առաքյալների եկեղեցին հետագայում (1915 թ-ի Ցեղասպանությունից հետո) թուրքերը վերածել են մզկիթի: Թուրք պաշտոնյան հայտնել է, որ Կարս ժամանող արտասահմանցի զբոսաշրջիկները հիմնականում ցանկանում են տեսնել Տասներկու Առաքյալներ եկեղեցին եւ պատմական հայկական Անիի ավերակները:
Մոտ 1000 տարի առաջ կառուցված Տասներկու Առաքյալները մզկիթի վերածվելուց հետո չի փոխել իր արտաքին եւ ներքին տեսքը: Հանվել է եկեղեցու գմբեթի խաչը, եկեղեցու ներսում խորանի կողքը կառուցվել է փայտե ամբիոն` մոլլայի ելույթի համար: Թեեւ Հայոց ցեղասպանությունից հետո եկեղեցին վերածվել է մզկիթի եւ գործել որոշ ժամանակ, սակայն այն այժմ որպես մզկիթ չի օգտագործվում: