3 րոպեի ընթերցում
ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Թուրքիայի մայրաքաղաք Անկարայումմեկնարկել է ցուցահանդես«Գետի մյուս ափը» խորագրով` նվիրված Թուրքիային և Հայաստանին: Ինչպես հաղորդում է «Արմենպրես»-ը` վկայակոչելով հայկական «Ակոս» պարբերականը, ցուցահանդեսը նվիրված է հայ-թուրքական սահմանին, որը բաժանում է երկու ժողովուրդներին, նրանց մշակույթները և պատմությունը:
Նախագծի համահեղինակներից Ալի Սալթանը «Ակոս»-ի թղթակցի հետ զրույցում պատմել է, որ նախագծի մտահղացումն առաջացել է այն ժամանակ, երբ հանդիպել և զրուցել են Հայաստանի սահմանամերձ գյուղերից մեկի բնակչուհու հետ: ««Մերհաբարև» նախագծի շրջանակներում հասցրել էինք Ռուբեն Մանգասարյանի (ով նախագծի հեղինակներից էր) հետ լինել սահմանամերձ թուրքական և հայկական գյուղերում: Վերջին գյուղը, որ այցելեցինք, Բագարանն էր: Հայկական կողմը մեզ շատ լավ ընդունեց: Այնտեղ մեզ մի տուն հրավիրեցին, որի տանտիկինը պատմեց, թե ինչպես են իրենք ամեն օր հետևում սահմանի մյուս կողմում երեխաների, կանանց ձայներին, ծիծաղին, կենցաղի որոշ դրվագների: «Այնտեղի մարդկանց լավ տեսնել չեմ կարողանում: Երազանքս է մի օր այդ գյուղ գնալ, սակայն այստեղից և ոչ թե Վրաստանի տարածքով»,-ասել էր տանտիկինը: Այս խոսակցությունը հիմքը դարձավ մեր ցուցահանդեսի նախաձեռնության համար»,- պատմել է ազգությամբ թուրք Սալթանը:
Հիշեցնելով Հրանտ Դինքի հայտնի «Երկու մոտ ժողովուրդ, երկու հեռու հարևան» խոսքերը` Սալթանը պատմել է, որ իրենք երկու կողմի սահմանամերձ հայկական և թուրքական գյուղերն այցելելով հասկացել են, թե որոշ նմանություններ կան երկու կողմում: Խոսելով թուրքական սահմանի Հալըքըշլաք և հայկական սահմանի Բագարան գյուղերի մասին` Սալթանը նշում է, որ դրանք շատ լավ արտահայտել են Թուրքիայի և Հայաստանի հասարակությունների միջև հարաբերությունները: «Այսքան մոտիկ, բայց և այսքան հեռու երկու հասարակություն». այսպիսի բնութագիր է տվել Սալթանը:
Անկարայում մեկնարկած ֆոտո-ցուցահանդեսը կավարտվի նոյեմբերի 16-ին: «Գետի մյուս ափը» խորագրով ցուցահանդեսընախատեսվում է իրականացնել նաև Կարսում, Ստամբուլում և Դիարբեքիրում: Արդեն դեկտեմբերին այն կլինի Երևանում, ինչպես նաև Գյումրիում: