1 րոպեի ընթերցում
ԵՐԵՎԱՆ, 17 ՀՈԿՏԵՄԲԵՐԻ, ԱՐՄԵՆՊՐԵՍ: ՈՒԵՖԱ-ն 5000 եվրո գումարով տուգանել է Գյումրիի «Շիրակ» ֆուտբոլային ակումբին: Պատճառը` Եվրոպայի լիգայի ընտրական երկրորդ փուլի հուլիսի 26-ին իսրայելական «Բնե Յեհուդայի» հետ կայացած հանդիպման ժամանակ լրագրողների կողմից տեխնիկական գոտին խախտելն էր: Այս մասին «Արմենպրես»-ին տեղեկացրին «Շիրակ» ակումբի մամլո ծառայությունից:
«Շիրակի» ֆուտբոլային ակումբի նախագահ Արման Սահակյանը նշել է, որ կարելի է հասկանալ նաև լրագրողներին, քանի որ նրանց ոգեւորությունը մեծ է եղել: «Մենք, իհարկե, հասկանում էինք բոլորի ոգևորվածությունը և հետաքրքրությունն այդ հանդիպման նկատմամբ, քանի որ «Շիրակ»-ն իր պատմության մեջ առաջին անգամ էր դուրս գալիս Եվրոպայի լիգայի երկրորդ փուլ: Սակայն մենք նախապես բոլոր լրագրողներին զգուշացրել էինք, որպեսզի չխախտեն տեխնիկական գոտին և մնան իրենց հատկացված գոտում: Այնուհանդերձ, լրագրողների մեծ մասը շարունակեց մնալ այն վայրերում, որտեղ իրենց հարմար էր»,-ասել է Արման Սահակյանը:
Հայաստանի ընթացիկ առաջնությունում «Շիրակ»-ը 52 միավորով երկրորդ հորիզոնականում է. առաջատարը Երեւանի «Միկա»-ն է` 55 միավոր: