Սարգիս Հովսեփյանը հեռանում է ֆուտբոլից

ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի ֆուտբոլի ազգային հավաքականի եւ «Փյունիկ»-իավագ Սարգիս Հովսեփյանը որոշում է կայացրել թողնել մեծ ֆուտբոլը:Ինչպես «Արմենպրես»-ին տեղեկացրին «Փյունիկ» ֆուտբոլային ակումբից, բազմափորձ ֆուտբոլիստը հանդես է եկել հայտարարությամբ.«Ֆուտբոլային ընտանիքի հարգելի ներկայացուցիչներ. արդեն 24 տարի է, ինչ ես մեծ ֆուտբոլում եմ: Հայաստանի անկախացումից ի վեր ես անմնացորդ նվիվել եմ մեր ֆուտբոլին: Եվ ազգային հավաքականում, եւ«Փյունիկ»-ում,ինչպես նաև մյուս ակումբներում, որտեղ խաղացել եմ, միշտ խաղադաշտ եմ մտել հաղթանակի նշանաբանով և արդար խաղի գաղափարով: Կարծում եմ, որ եկել է ժամանակը, երբ անհրաժեշտ է դադարեցնել ելույթներս»:

Սարգիս Հովսեփյանը շնորհակալություն է հայտնել այն բոլոր մարդկանց, որոնց հետ միասին կերտել է այս ժամանակաշրջանի ֆուտբոլի պատմությունը. դրանց թվում պաշտպանն առանձնահատուկ նշել է Հայաստանի Ֆուտբոլի Ֆեդերացիայի նախագահ Ռուբեն Հայրապետյանի, «Փյունիկ» ակումբի բոլոր ղեկավարների, ակումբում աշխատած բոլոր մարզիչների եւ ֆուտբոլիստների անունները:«Ցանկանում եմ հատուկ շնորհակալություն հայտնել Հայաստանի ազգային հավաքականի գլխավոր մարզիչ Վարդան Մինասյանին, ում հետ շատ հաճելի էր աշխատելը: Նրա գլխավորությամբ մեր հավաքականը հասավ առայժմ ամենամեծ բարձունքին: Շնորհակալ եմ հավաքականում հանդես եկած իմ բոլոր խաղընկերներին, որոնց հետ միասին երկար տարիներ պաշտպանել եմ մեր երկրի պատիվը: Շնորհակալություն ֆուտբոլասերներին, ովքեր աջակցել են մեզ»,-ասել է Հովսեփյանը:

Ազգային ընտրանու ավագըերախտագիտություն է հայտնել նաեւ ռուսական «Զենիթ» և «Տորպեդո» ակումբներին, որտեղ անցկացրել է իր կարիերայի մի քանի տարիները:

«Ես երջանիկ եմ, որ այսքան երկար տարիներ եղել եմ ֆուտբոլում: Մեծ հաղթանակներ եմ մաղթում Հայաստանի ազգային հավաքականին, մեր հայկական ֆուտբոլին և իմ հարազատ «Փյունիկին»»,-հայտարարության մեջ ասել է Հովսեփյանը:

ՍարգիսՀովսեփյանը ծնվել է 1972 թվականին: Ազգային հավաքականի ավագն իր Ֆուտբոլային կարիերան սկսել է 1990 թվականին «Մալաթիա Երեւան» ակումբից: 1992 թվականից սկսած Հովսեփյանն ազգային հավաքականի անդամ է: