2 րոպեի ընթերցում
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Հունաստանի եւ Գերմանիայի ֆինանսների նախարարներ Յանիս Ստուրնարասը եւ Վոլֆգանգ Շոյբլեն քննարկել են Հունաստանի խիստ խնայողության միջոցառումների ծրագիրը, առանց որոնց Աթենքը չի կարողանա ստանալ Եվրամիության հերթական վարկաբաժինը, հաղորդում Է «Արմենպրեսը»՝ հղում անելով ՌԻԱ Նովոստիին: Բեռլինում կայացած հանդիպումը շարունակվել Է երկու ժամ, նախարարները մամուլի համար հայտարարություններ չեն արել, բայց հունական ԶԼՄ-ները, հղում անելով պատվիրակության աղբյուրների, հաղորդել են, որ զրույցն անցել Է «շատ ջերմ մթնոլորտում», եւ որ նախարարները քննարկել են բոլոր խնդիրները:
Դրա հետ մեկտեղ Շոյբլեն Հունաստանից պահանջել Է ամբողջովին կատարել հայտարարված բարեփոխումները, եթե երկիրը ցանկանում Է լրացուցիչ օգնություն ստանալ միջազգային վարկատուներից: «Շատ կարեւոր Է, որ Հունաստանը ամբողջովին կատարի իր ստանձնած պարտավորությունները: Գերմանիայի ֆինանսների նախարարը դա պարզորոշ հասկանալ Է տվել իր գործընկերոջը»,-ասված Է հանդիպման արդյունքների վերաբերյալ Գերմանիայի ֆինանսների նախարարության հայտարարության մեջ:
Ինչպես սպասվում Է, ֆինանսների նախարարի նոր հանդիպումը տեղի կունենա առաջիկա օրերին Նիկոսիայում Եվրախմբի խորհրդակցության շրջանակներում, որտեղ կքննարկվի Կիպրոսին օգնության հատկացնելու հարցը: