2 րոպեի ընթերցում
ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: Թուրքիայի իշխող «Արդարություն եւ զարգացում» կուսակցության (ԱԶԿ) Մուղլայից ընտրված պատգամավոր Ալի Բողան հայտարարել է, որ անհրաժեշտ է բոլոր դպրոցները Թուրքիայում դարձնել կրոնական վարժարաններ:
Ինչպես հաղորդում է «Արմենպրես»-ը` վկայակոչելով թուրքական «Ջումհուրիեթ» թերթը, թուրք պատգամավորը դժգոհություն է հայտնել Մուղլայի կրոնական վարժարաններ նվազ թվով աշակերտների դիմելու կապակցությամբ եւ նշել, որ այդ դպրոցների բացման համար ինքը «մեծ պայքար» է տարել, ասել, որ դա «հիասթափեցրել» է իրեն:
«ԱԶԿ-ի իշխանության գալուց հետո Թուրքիայի դպրոցներում հնարավոր է դարձել ուսումնասիրել աստվածաբանություն առարկան, իսկ անցկացնել Ղուրանի ընթերցումներ: Սա մի հնարավորություն է աճող սերնդին Ղուրանով դաստիարակելու եւ Մուհամեդ մարգարեի կյանքն ուսումնասիրելու համար: Անհրաժեշտ է Թուրքիայի բոլոր դպրոցները դարձնել կրոնական վարժարաններ, որպեսզի մեր ապագա սերունդը հարգանքով վերաբերվի եւ պաշտի մեր պատմությունը, մշակույթը, հավատը», - ասել է ԱԶԿ գործիչը:
Նշենք, որ 2003 թ-ին իշխանության գալուց հետո, 1923 թ-ին հիմնադրված աշխարհիկ Թուրքիայի Հանրապետության համար ԱԶԿ-ն ընտրել է դեպի իսլամ տանող ճանապարհը: