1 րոպեի ընթերցում
ԵՐԵՎԱՆ, 22 ՕԳՈՍՏՈՍԻ, ԱՐՄԵՆՊՐԵՍ: Ադրբեջանում Միացյալ Նահանգների նորանշանակ դեսպան Ռիչարդ Մորնինգսթարը դեռ Բաքու չմեկնած արդեն հասցրել է «կատաղեցնել» այդ երկրի իշխանություններին: Մորնինգսթարը Վաշինգտոնում հանդիպել է Ադրբեջանի իշխանությունների ակտիվ քննադատ եւ ընդդիմադիր գործիչ, «Ամերիկայի ադրբեջանցիները հանուն ժողովրդավարության» (AZAD) շարժման նախագահ Էլմար Շախտախտինսկիի հետ: Այս մասին, ինչպես հաղորդում է «Արմենպրես»-ը, հայտնում է ադրբեջանական azerireport.com լրատվական կայքը:
Նշվում է, որ անցյալ շաբաթ Մորնինգսթարի հետ հանդիպումից հետո Շախտախտինսկին կայքին հայտնել է, որ ամերիկացի փորձառու դիվանագետը շատ հստակ գիտե Ադրբեջանում առկա իրավիճակը: «Նա ինձ վստահեցրեց, որ ապագայում Ադրբեջանի իշխանության հետ որեւէ անձնական բիզնես-գործունեություն հաստատելու նպատակ չունի», -ասել է AZAD-ի ղեկավարը:
Ադրբեջանական ԶԼՄ-ները, որոնք օրեր առաջ հայտնել էին, որ Ադրբեջանում ԱՄՆ-ի դեսպան Ռիչարդ Մորնինգսթարը Բաքու կժամանի օգոստոսի վերջին,հանդիպումից հետեւություններ են արել, որ Մորնինգսթարն իր գործողություններով արդեն հարուցել է ադրբեջանական իշխանությունների զայրույթն ու «կատաղությունը»: