Փրկարարներին հաջողվել է Դավիթբեկի ջրամբարից հանել ջրասույզ եղած մեքենան
2 րոպեի ընթերցում
![Փրկարարներին հաջողվել է Դավիթբեկի ջրամբարից հանել ջրասույզ եղած մեքենան](http://armenpress.am/resized/480/static/news/b/2012/08/690659.jpg)
ԿԱՊԱՆ, 18 ՕԳՈՍՏՈՍԻ, ԱՐՄԵՆՊՐԵՍ:Փրկարարներին վերջապես հաջողվել է օգոստոսի 17-ի ուշ երեկոյան` ժամը 10.30-ի սահմաններում Դավիթբեկի ջրամբարից դուրս բերել օգոստոսի 11-ի կեսգիշերին ջրասույզ եղած «ՎԱԶ 106» մակնիշի ավտոմեքենան եւ հանձնել տիրոջը:
Նրանց օգնել են Սեւանից ժամանած երեք փրկարարներ: «Մեքենան ջրասույզ էր եղել ափից 25 մ հեռավորության եւ 13 մ խորության վրա եւ հայտնվել տիղմի, քարերի, ծառի ճյուղերի ու կոճղերի արանքում, ինչն էլ դժվարացրել էր աշխատանքները: Այդ պայմանների համար մեր փրկարարները համապատասխան հանդերձանք չունեին եւ դրա համար դիմել ենք Սեւանի փրկարարներին, որոնց աջակցությամբ էլ, տեխնիկայի օգնությամբ հանվել է մեքենան»,- «Արմենպրես»-ին ասաց Արտակարգ իրավիճակների նախարարության Սյունիքի մարզային փրկարարական ծառայության պետ Արթուր Հարությունյանը:
Ջրասույզ մեքենան դուրս բերելու համար փրարարներն աշխատել են երկու օր: Երեկ աշխատանքները սկսել էին ժամը 18:00-ից: Մեքենան պատկանում է Կապանի Ձորք թաղամասի բնակիչ Մհեր Հայրապետյանին, ով որոշել էր Դավիթբեկի ջրամբարի ափին, որը տեղացիներին առավել հայտնի է Չայզամի լիճ, նշել իր 25-ամյակը: Տոնախմբությունից տուն վերադառնալուց առաջ, տղաները ցանկացել են լողանալ եւ մեքենան կանգնեցրել են լճից 10-15 մ բարձրության վրա գտնվող բացատում, որտեղից էլ մեքենան գլորվել է ջուրը եւ սուզվել: Բարեբախտաբար մեքենայում մարդիկ չեն եղել եւ ոչ ոք չի տուժել: