Շենացող Գյումրին այլևս այլ կերպ է ժպտում աշխարհին. «Գյումրու օր»-ը նշվեց բազմաբնույթ միջոցառումներով

ԳՅՈՒՄՐԻ, 28 ՀՈՒԼԻՍԻ, ԱՐՄԵՆՊՐԵՍ։ Գյումրին հուլիսի 28-ին նշում է քաղաքի օրը։ Տոնակատարությունների մեկնարկը տրվեց բերքահավաքով, որին մասնակցեցին Գյումրի համայնքի ղեկավար Վարդգես Սամսոնյանը, համայնքի ղեկավարի առաջին տեղակալ Լուսինե Սանոյանը, համայնքի ղեկավարի տեղակալ Սուրեն Ջանոյանը, համայնքային իշխանության այլ ներկայացուցիչներ, աշխատակիցներ։ Ինչպես տեղեկացնում է «Արմենպրես»-ը, քաղաքի տարբեր հատվածներից հավաքված բերքը տեղափոխվեց Հովհաննես Շիրազի հուշատուն-թանգարանի բակ՝ գյումրեցիներին ու քաղաք այցելած հյուրերին հյուրասիրելու համար։

Բարձր տրամադրությամբ և մշակութային հագեցած միջոցառումներով տոնը շարունակվեց Աբովյան ճեմափողոցում՝  արհեստի ու արվեստի տոնավաճառ, «Ամեն ժամանակի քաղաք» լուսանկարչական ցուցահանդես, տեղի պարային խմբերի ելույթներ։

Օրվա խորհրդով պայմանավորված՝ միջոցառումներ էին կազմակերպվել քաղաքի տարբեր մշակութային կառույցներում։

«Այս տարի քաղաքն իր օրը տոնում է «Իմ սրտի քաղաք» խորագրով, և, իրապես, մեզանից յուրաքանչյուրի սրտում Գյումրին իր ուրույն տեղն ունի իր յուրօրինակ դիմագծով, պատմությամբ, մշակույթով, բարբառով ու կենցաղով: 

Դեռ երեկվանից քաղաքը հյուրընկալում է Հայաստանի և աշխարհի տարբեր անկյուններից ժամանած հյուրերին. «Ֆեստիվառ» զբոսաշրջային-երաժշտական փառատոնը Գյումրի էր բերել հազարավոր մարդկանց: Տոնական բարձր տրամադրությամբ, մշակութային հագեցած միջոցառումներով քաղաքը շարունակում է ընդունել իր հյուրերին արդեն «Գյումրու օր» տոնակատարությունների շրջանակներում: Օր-օրի կառուցվող ու շենացող քաղաքը այլևս այլ կերպ է ժպտում աշխարհին, և դա մեզ ավելի մեծ մղումով ստիպում է շարժվել առաջ: Մենք շարունակելու ենք շենացնել ու զարգացնել Գյումրին, մենք շարունակելու ենք ձեռք-ձեռքի տված բարեկարգել, նորոգել, մաքրել ու խնամել, ստեղծել ու ստեղծագործել այս քաղաքում, կյանքի կոչել և պատվով ավարտին հասցնել տասնյակ ծրագրեր: Քաղաքի շենացման գործում խիստ կարևոր է յուրաքանչյուրիս անձնական նվիրումը, սրտացավ ու հոգատար վերաբերմունքը քաղաքի ամեն մի քարին, ամեն մի ծառին ու թփին, ամեն մի անկյանը»,-շնորհավորելով գյումրեցիներին՝ նշեց Գյումրու քաղաքապետ Վարդգես Սամսոնյանը։

 «Գյումրու օր» տոնսկատարության շրջանակներում միջոցառումները Աբովյան փողոցում կշարունակվեն մինչև ժամը 23։00-ը։    

Արմենուհի Մխոյան