2 րոպեի ընթերցում
ԿԱՊԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Երկրաշարժի հետեւանքներն ուսումնասիրելու նպատակով Սյունիքի մարզպետ Սուրիկ Խաչատրյանի հանձնարարությամբ ստեղծված մասնագիտական հանձնաժողովը` մարզպետարանի քաղաքաշինության վարչության պետ Արշակ Ուստաբաշյանի գլխավորությամբ Մեղրիի տարածաշրջանից հետո ստացված ահազանգերի հետքերով եղավ նաեւ Գորիսում ու տարածաշրջանի գյուղական համայնքներում:
«Հանձնաժողովի մասնագետների կողմից իրականացված արտաքին զննման արդյունքում պարզվել է, որ չնայած որոշ առանձնատներ և բարձրահարկ շենքեր Ագարակում որոշակի վնաս են կրել, սակայն դա իրենից մեծ վտանգ չի ներկայացնում: Առավել տուժել են Մեղրիի տարածաշրջանի Վարդավար, Գուդեմնիս, Կուրիս գյուղերի մեկ եւ երկու հարկանի մի քանի առանձնատներ, որոնք հողաշեն են` կառուցված 100-120 տարի առաջ, երբեք չեն ամրացվել եւ բնական է, որ նման ցնցման դեպքում դրանց վնասվելու հավանականությունը շատ մեծ է եղել: Այս առանձնատները հիմնականում ամառանոցներ են, որոնց տերերը Ագարակի եւ Մեղրիի բանկիչներ են», - «Արմենպրես»-ի թղթակցի հետ զրույցում ասաց մարզպետարանի քաղաքաշինության վարչության պետ Արշակ Ուստաբաշյանը:
Հանձնաժողովը ուսումնասիրություններ է իրականցրել նաեւ Կապանում, դարձյալ անհատական տներում, քանի որ ահազանգեր բարձրահարկ շենքերի բնակիչներից չեն ստացվել: Կապանում լուրջ վնասներ կրել է մեկ առանձնատուն: Ըստ քաղաքաշինության վարչության պետի` Սիսիանի տարածաշրջանում ուսումնասիրություններ չեն կատարվել, քանի որ դրա կարիքը չի եղել: Հանձնաժողվն ուսումնասիրությունների ավարտից հետո կկազմի եզրկացություն, որը կներկայացվի ԱԻ եւ տարածքային կառավարման նախարարություններին: