Հայրավանքի մոտ տեղի ունեցած խոշոր ավտովթարի վիրավորների կյանքին վտանգ չի սպառնում

ԳԱՎԱՌ, 10 ՕԳՈՍՏՈՍԻ, ԱՐՄԵՆՊՐԵՍ: Օգոստոսի 9-ին` ժամը 12.30-ի սահմաններում, խոշոր ավտովթար է տեղի ունեցել Գեղարքունիքի մարզի Հայրավանք գյուղի մոտակայքում` Գետափ-Մարտունի-Սեւան ավտոճանապարհի վրա: Իրար են բախվել Գավառի հացի գործարանին պատկանող «ՈՒԱԶ» եւ նույն քաղաքի տաքսի ծառայությանը պատկանող «ՎԱԶ-31105» ավտոմեքենաները, ինչի հետեւանքով մարմնական տարբեր վնասվածքներով Գավառի բժշկական կենտրոն է տեղափոխվել յոթ մարդ:

Ինչպես «Արմենպրես»-ին տեղեկացրեց Գավառի բժշկական կենտրոնի տնօրեն Աշոտ Կարապետյանը՝ օգոստոսի 9-ին մայրաքաղաք է տեղափոխվել «ՎԱԶ-31105» մեքենայի վարորդ Աշոտ Պարոնյանը, ով ստացել է ազդրերի բեկորային, ինչպես նաեւ կոնքոսկրի եւ կողոսկրերի կոտրվածք: Տաքսի մեքենայում գտնվող մյուս ուղեւորները՝ Գավառ քաղաքի բնակիչներ Գեղամ Հայրապետյանը, Տաթեւիկ Սարգսյանը, Թամարա Բոստանջյանը եւ Երեւան քաղաքի բնակիչ Անահիտ Ալոյանը տարբեր կոտրվածքներով ու վնասվածքներով այժմ գտնվում են Գավառի բժշկակական կենտրոնում` առողջական բավարար վիճակում: Այստեղ բուժօգնություն են ստանում նաեւ «ՈՒԱԶ» մակնիշի ավտոմեքենայի վարորդ Վանիկ Սարգսյանը եւ ուղեւոր Ռուբիկ Վարդանյանը, ովքեր ստացել են գլխուղեղի սալջարդ եւ գանգուղեղի կոտրվածք: Նրանց վիճակը գնահատվում է միջին ծանրության:

Վթարի հետեւանքով վնասվածքներ ստացած յոթ անձանց կյանքին օգոստոսի 10-ի երեկոյան դրությամբ որեւէ վտանգ չի սպառնում: