Հանքային ջրերի արտահանման ծավալներով Հայաստանը տարեցտարի ավելի մեծ ցուցանիշներ է արձանագրում

ԵՐԵՎԱՆ, 20 ՀՈՒԼԻՍԻ, ԱՐՄԵՆՊՐԵՍ: Բնական և արհեստական հանքային ջրերի և առանց շաքարի ըմպելիքների արտահանման ծավալներով Հայաստանը տարեցտարի ավելի մեծ ցուցանիշներ է արձանագրում: Ինչպես «Արմենպրես»-ին տեղեկացրին ՀՀ Ազգային վիճակագրական ծառայությունից, 2009 թվականին Հայաստանից արտահանվել է 7561 տոննա բնական, արհեստական հանքային ջուր և ըմպելիք (առանց շաքարի), 2010 թվականին` 12777 տոննա, 2011-ին` 13294 տոննա, իսկ այս տարվա առաջին հինգ ամիսների տվյալներով` 4397 տոննա: Հայկական հանքային ջուրը մեծ պահանջարկ ունի հիմնականում ԱՊՀ, Եվրոպական և Միջին Արևելքի երկրներում: Արտադրական և արտահանման ծավալներով ոլորտի առաջատարներից է համարվում «Ջերմուկ գրուպ» ընկերությունը:

«Ջերմուկ գրուպ» ընկերությունն իր տարեկան արտադրանքի 60-65 տոկոսն արտահանում է 19 երկրներ, որոնց թվում առաջին տեղում է Ռուսաստանի Դաշնությունը: Ընկերության ուշադրության կենտրոնում են գտնվում նաև ուկրաինական և ղազախական շուկաները, որտեղ արտահանման ծավալները նախատեսվում է ավելի մեծացնել: Ինչպես «Արմենպրես»-ին հաղորդեցին ընկերությունից, յուրաքանչյուր տարի հանքային ջրի արտահանման ծավալներն աճում են շուրջ 20 տոկոսով, իսկ ապրանքի գինն էլ կախված է տվյալ երկրի ֆինանսատնտեսական վիճակից:

Ոլորտի մի շարք այլ ընկերություններ արտահանման մասին տվյալները համարելով կոմերցիոն գաղտնիք` զերծ մնացին տեղեկություններ հաղորդելուց: