Իսրայելի դեսպանն ադրբեջանցիներին խորհուրդ է տվել հայերի հետ ուղիղ բանակցություններ վարել
1 րոպեի ընթերցում
ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: Ադրբեջանում Իսրայելի դեսպան Միխաել Լոտեմը ադրբեջանցիներին խորհուրդ է տվել հայերի հետ ուղիղ բանակցություններ վարել Լեռնային Ղարաբաղի հակամարտության կարգավորման հարցում:
Ինչպես հաղորդում է «Արմենպրես»-ը, 1news.az-ին տված հարցազրույցում Լոտեմն ասել է. «Տարբեր արտաքին խաղացողներ կարող են ներգրավվել բանակցային գործընթացում, երաշխավոր դառնալ, խրախուսել տարբեր նախաձեռնություններ, բայց, վերջին հաշվով, համաձայնության պետք է գան երկու երկրների առաջնորդներն` իրենք: Պաղեստինիցիների հետ հակամարտության կարգավորման մեր փորձից կարող ենք ասել, որ ուղիղ բանակցություններ են անհրաժեշտ»:
Խոսելով պաշտպանության ոլորտում ադրբեջանա-իսրայելյան համագործակցության մասին` դեսպանը նշել է. «Այո, մեր միջեւ ռազմական բնագավառում համագործակցություն առկա է: Իսրայելն առանց ուշադրության չի թողնում Ադրբեջանին հետաքրքրող ռազմական տեխնիկայի ցանկը»: