1 րոպեի ընթերցում
ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ:ՀՀ փոխվարչապետ, տարածքային կառավարման նախարար Արմեն Գեւորգյանն հունիսի 28-ին Գեղարքունիքի մարզպետարանի աշխատակազմին, մարզային կառույցների, համայնքների ղեկավարներին ներկայացրել է նորանշանակ մարզպետ Ռաֆիկ Գրիգորյանին:
Ինչպես «Արմենպրես»-ին տեղեկացրին ՏԿՆ հասարակայնության հետ կապերի բաժնից,Գեւորգյանը համատեղ աշխատանքի համար շնորհակալություն է հայտնել նախկին մարզպետ Նվեր Պողոսյանին: Նա հատկապես բարձր է գնահատել Պողոսյանի ջանքերը` մարզում նախորդ տարիների կուտակած պարտքերի մարման, վարչարարության բարելավման ուղղությամբ:
Ներկայացնելով նորանշանակ մարզպետին` փոխվարչապետը նկատել է, որ նա նոր մարդ չէ, երկար տարիներ աշխատել է մարզի թե տեղական ինքնակառավարման, թե տարածքային կառավարման մարմիններում, իսկ պատգամավորական գործունեության ընթացքում մշտապես անդրադարձել է մարզում առկա խնդիրներին: Փոխվարչապետը հաջողություն է մաղթել Գրիգորյանին` վստահություն հայտնելով, որ նա կկարողանա սահուն կերպով ապահովել աշխատանքների շարունակականությունը եւ իր ներդրումը կունենա տարածքային կառավարման համակարգում իրականացվող բարեփոխումների գործում: