1 րոպեի ընթերցում
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: Իսրայելի խորհրդարանում` Կնեսեթում հունիսի 12-ին քննարկումներ են կազմակերպվել Հայոց ցեղասպանության խնդրի առնչությամբ: Ինչպես հաղորդում է «Արմենպրես»-ը` վկայակոչելով Izrus տեղեկատվական պորտալը, քննարկման ընթացքում Խադաշ կուսակցությունը ներկայացնող պատգամավոր Դով Հանինը նշել է, որ Հայոց ցեղասպանության հարցի համատեքստում չպետք է քննարկվեն ինչ-որ թվեր կամ պետական անվտանգության խնդիրները:
«Սիրիական անապատներ աքսորված հարյուր հազարավոր հայերի սպանդը փաստ է»,- նշել է պատգամավորը: Հանինը նաև հիշեցրել է, որ Ադոլֆ Հիտլերը որոշում է ընդունել իրագործել Հոլոքոստ, քանի որ վստահ է եղել, որ ինչպես Հայոց ցեղասպանության պարագայում, անպատիժ է մնալու:
Կնեսեթում Հայոց ցեղասպանության հարցի շուրջ քննարկումները կազմակերպվել են Իսրայելի խորհրդարանի նախագահ Ռյովեն Ռիվլինի նախաձեռնությամբ, սակայն քննարկումների արդյունքում որևէ փաստաթուղթ չի ընդունվելու: