Հիմնանորոգվել է Գեղհովիտ գյուղի մանկապարտեզը

Հիմնանորոգվել է Գեղարքունիքի Գեղահովիտ գյուղի մանկապարտեզը: Տարեմուտից առաջ հիմնանորոգ այս շենքը անգնահատելի նվեր է Գեղհովիտի հասարակության, մանկապարտեզի մանկավարժ-դաստիարակների եւ 150 սաների համար: Ինչպես հաղորդում է «Արմենպրես»-ի` Գեղարքունիքի թղթակիցը, այս կարեւոր ձեռնարկը, որով մանկապարտեզը դառնում է ժամանակակից ու շուրջտարյա գործող, հնարավոր է եղել իրականացնել Հայաստանի սոցներդրումների հիմնադրամի կողմից ներդրված 152,1 մլն եւ Գեղհովիտի գյուղապետարանի 3 միլիոն 900 հազար դրամի ֆինանսավորմամբ: Մանկապարտեզը կվերաբացվի տարեմուտից առաջ: Իրականացել է նաեւ Գեղհովիտի համար կենսական կարեւորության մեկ այլ ծրագիր: Հոկտեմբեր ամսին «Հազարամյակի մարտահրավեր» ծրագրի ֆինանսական օժանդակությամբ կառուցվել է 4 կմ 400 մ երկարության երրորդ կարգի ոռոգման ջրանցք, ինչի արդյունքում Գեղհովիտում ջրարբիացված հողատեսքերը ավելացել են 400 հա-ով: Ջրանցքի կառուցման նախահաշվային արժեքը կազմել է 120 միլիոն դրամ, որի 25 տոկոսը ներդրել է Գեղհովիտի գյուղապետարանը: Գյուղապետ Վարդան Պողոսյանի անձնական միջոցների հաշվին, մոտ 3 միլիոն դրամի ներդրմամբ կառուցվել է նաեւ գյուղի մուտքը խորհրդանշող քարակերտ ցուցանակը` 2 հուշասյուներով: