Հայաստանը մինչեւ 65 մլն ԱՄՆ դոլարի վարկ կստանա`փոքր եւ միջին բիզնեսն ընդլայնելու նպատակով
1 րոպեի ընթերցում
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Ասիական զարգացման բանկը հաստատել է Հայաստանին մինչեւ 65 միլիոն ԱՄՆ դոլարի վարկի տրամադրումը. նպատակը երկրում փոքր եւ միջին բիզնեսի ընդլայնելն է: Ինչպես «Արմենպրես»-ին տեղեկացրին ԱԶԲ-ի հայաստանյան գրասենյակից, վարկը կտրամադրվի հայկական չորս բանկերին' հինգ տարի ժամկետով, որոնք էլ կտրամադրվեն փոքր ու միջին բիզնեսով զբաղվող ձեռնարկություններին: Վերջիններս կազմում են երկրի ձեռնարկատիրության գրեթե 98 տոկոսը' ապահովելով ՀՆԱ-ի ու զբաղվածության 40 տոկոսը:
Նախատեսված վարկերը կտրամադրվեն «ACBA կրեդիտ ագրիկոլ», «Արդշինինվեստ», «Ամերիա» եւ «Ինեկո» բանկերին: Այդ բանկերն ունեն դրական երաշխավորություն ու պարտավորվել են ընդլայնել ՓՄՁ վարկավորումը:
Այս վարկային ծրագիրն ունի մի շարք նոր մոտեցումներ, ներառյալ այն պայմանը, որ բիզնես վարկեր պետք է տրամադրվեն նաեւ Երեւանից դուրս, որտեղ աղքատության սանդղակն ավելի բարձր է ու ֆինանսավորման հնարավորությունն ավելի սահմանափակ:
ԱԶԲ-ն բանկերին կտրամադրի նաև փորձագիտական աջակցություն ՓՄՁ-ներին ավելի ընդլայնված ծառայություններ մատուցելու համար: