2 րոպեի ընթերցում
ԳՅՈւՄՐԻ, 16 ՆՈՅԵՄԲԵՐԻ, ԱՐՄԵՆՊՐԵՍ: Գյումրու զինվորական կոմիսարիատից այսօր Հայոց ազգային բանակ մեկնեց զորակոչիկների առաջին խումբը՝ 20 պատանիներ, ովքեր բուժզննման արդյունքում ճանաչվել են ծառայության համար պիտանի: Նրանք 18 տարին լրացած կամ նախկինում պարտադիր զինվորական ծառայության տարկետում ունեցող եւ այժմ տարկետումից չօգտվող երիտասարդներն են: Զինվորական կոմիսարիատում առողջական նույնիսկ աննշան խնդրի դեպքում պատանիները ենթարկվում են կրկնակի բուժզննման:
Ինչպես «Արմենպրես»-ի թղթակցին տեղեկացրեց Գյումրու զինվորական կոմիսար գնդապետ Արթուր Ղազարյանը, եթե կան հիվանդներ, որոնք ավելի հանգամանալից բուժզննման խնդիր ունեն, ուղեգրվում են ստացիոնար հիվանդանոցներ եւ տեղում իրականացվում են համապատասխան ստուգումներ: Այդ ստուգումների արդյունքների հիման վրա ընդունվում է որոշում, սակայն, եթե այս դեպքում էլ իրական պատկերը չի ստացվում, պատանին ուղարկվում է հանրապետական կենտրոնական բժշկական հանձնաժողով, որտեղ էլ տրվում է ճշգրիտ' վերջնական որոշումը:
«Այսօր բոլորի ուշադրությունը սեւեռված է նրան, որ զինված ուժերը համալրվեն առողջ պատանիներով, որպեսզի հետագայում որեւէ խնդիր չունենանք: Ոչ մի հիվանդ երեխա չի մեկնելու հավաքակայան, եւ դրա համար մեր պահանջն է, որ լուրջ հետազոտություններ կատարվեն»,-ասաց գնդապետը:
Խոսելով ինքնավնասման դեպքերի մասին' գնդապետը նշեց, որ նման իրավիճակի դեռ չեն առնչվել: «Ես զարմանում եմ, որ բուհ ավարտած տղան կարող է ընդունակ լինել նման քայլի: Ուրախ եմ, որ ծառայությունից խուսափող պատանիների նվազման միտում կա: Ունենք շատ պատանիներ, ովքեր, գիատակցելով ծառայության կարեւորությունը, վերադառնում եմ արտերկրից»,-նշեց նա: