Ազատ եւ թափանցիկ ընտրությունները կնպաստեն Հայաստանում ժողովրդավարության զարգացմանը. Լոնսդեյլ
2 րոպեի ընթերցում
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Մեծ Բրիտանիան կողմնակից է Հայաստանի եւ Եվրամիության համագործակցությանը, քանի որ դրանք հիմք են ստեղծում Հայաստանում հետագա բարեփոխումների համար: Այս մասին նոյեմբերի 14-ին լրագրողների հետ հանդիպման ժամանակ նշեց Հայաստանի Հանրապետությունում Մեծ Բրիտանիայի եւ Հյուսիսային Իռլանդիայի Միացյալ թագավորության արտակարգ եւ լիազոր դեսպան Չարլզ Լոնսդեյլը:
«Իմ պաշտոնավարման 4 տարիների ընթացքում ես տեսա ներքին հարցերում թափանցիկություն' կառավարման եւ կոռուպցիայի խնդիրների ավելի բաց քննարկման հետ կապված: Մեծապես խրախուսական էր տեսնել ակն աշխատանքները, որոնք ուղղված էին օրենսդրական դաշտի ապահովմանն ու կոռուպցիայի դեմ պայքարին»,-ասաց Լոնսդեյլը:
Դեսպանը կարեւորեց ՀՀ նախագահ Սերժ Սարգսյանի այն հայտարարությունը, որ բիզնեսը պետք է տարբերակել իշխանությունից:
«Ողջունելի է նաեւ վարչապետի եւ նախագահի հայտարարությունը, որ ապագա ընտրությունները պետք է լինեն նորաստեղծ Հայաստանի պատմության մեջ ամենաարդարն ու թափանցիկը: Սա հիանալի հնարավորություն է Հայաստանի համար' ցույց տալու առաջընթաց ժողովրդավարական զարգացման ուղու վրա»,-նշեց դեսպանը:
Դեսպանը նշեց, որ Եվրամիության կողմից կիրականացվեն մեծածավալ ծրագրեր այս նախաձեռնությանը աջակցելու համար:
«Սա մեծ պատասխանատվություն կդնի իշխանության ուսերին' ապահովելու արդար եւ թափանցիկ ընտրություններ»,- կարծիք հայտնեց Չարլզ Լոնսդեյլը: