2 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Այս տարի հոկտեմբերին Գորիսի Վաղարշ Վաղարշյանի անվան պետական դրամատիկական թատրոնը կնշի իր 75- ամյակը: Ինչպես «Արմենպրես»-ի հետ զրույցում նշեց թատրոնի տնօրեն Համլետ Հարությունյանը, թատրոնի այսօրվա խնդիրը գլխավոր ռեժիսոր չունենալն է:»Ունենք բեմադրող ռեժիսոր, սակայն գլխավոր ռեժիսորի բացակայությունը պայմանավորված է ֆինանսական խնդիրներով:Հնարավորություն չունենք Երեւանից ռեժիսոր բերելու համար»,-ասաց նա' հավելելով, որ ռեժիսորները թելադրում են իրենց պայմանները,ինչն էլ թատրոնի հնարավորության սահմաններում չէ: Տնօրենի խոսքով'ամեն անգամ մի բեմադրություն կատարելիս թատրոնը ստիպված է լինում հրավիրելու տարբեր ռեժիսորների: Նման խնդիր կա եւ՛ Կապանում, եւ՛ Արցախում, եւ ՛ Գյումրիում:
Համլետ Հարությունյանը նշեց, որ յուրաքանչուր թատերաշրջանի ընթացքում լինում է երեք պրեմիերա: «Ներկայացումների ցուցադրությունը մի փոքր բարդ է այն առումով, որ հանդիսատեսը սիրով չի գալիս թատրոն: Մենք տարբեր միջոցներով ենք փորձում նրանց բերել դահլիճ»,-ասաց նա' հավելելով, որ դասական ներկայացում դնելը կապված է ռիսկի հետ:Թատրոնը գումար է ներդնում, սակայն հանդիսատես չի ունենում: Պատկերը հակառակն է կատակերգական ներկայացումների դեպքում, դահլիճը լեփ-լեցուն է լինում:
Հ. Հարությունյանի հավաստմամբ' թատրոնի համար այս տարիների կարեւորագույն ձեռքբերումը փոքր դահլիճի ստեղծումն է' նախատեսված մանկական բեմադրությունների համար: Դահլիճը կարող է ընդգրկել 100 հոգու եւ հնարավորություն կտա երեխաներին կապելու թատրոնի հետ:»Անկախ երեխաների քանակից, շաբաթ եւ կիրակի օրերին պետք է լինեն բեմադրություններ նրանց համար: Բեմադրվում են հայ դասականների հեքիաթներն ու պատմվածքները»,- նշեց նա: