2 րոպեի ընթերցում
ԵՐԵՎԱՆ, 31 ՕԳՈՍՏՈՍԻ, ԱՐՄԵՆՊՐԵՍ: Քաղաքական դաշտում բեւեռացումների առաջացման պահն անցել է: Այսօր լրագրողների հետ հանդիպման ժամանակ նման կարծիք հայտնեց Ազգային ժողովի ՀՀԿ խմբակցության ղեկավար Գալուստ Սահակյանը' շեշտելով, որ երկխոսությունը երկրում ստեղծված խնդիրների վերաբերյալ ելքեր գտնելու նպատակ է հետապնդում, ուստի Հայ ազգային կոնգրեսը պետք է հրաժարվի մեղադրական մոտեցումներից: «ՀԱԿ-ին երկխոսությունը դուրս բերեց ճահճից, քանի որ նա փորձեց հաղթահարել կոշտ ընդդիմության բարդույթը»,- նկատեց Գ.Սահակյանը:
«Կարծում եմ, որ երկխոսությունը մշտական երեւույթ է, քանի որ կան հակառակ կարծիքներ ունեցող ուժեր, ապա այն պետք է շարունակվի»,- ասաց ՀՀԿ խմբակցության ղեկավարը:
Անդրադառնալով ՀԱԿ ակտիվիստ Տիգրան Առաքելյան խափանման միջոցի անփոփոխ թողնելը որպես երկխոսության առկախման պատճառ հայտարարելու մասին ՀԱԿ-ի որոշմանը, Գ.Սահակյանն ընդգծեց, որ դա դատարանի խնդիրն է եւ ոչ թե կոալիցիայի կամ ՀԱԿ-ի: «Երկխոսությունը դադարեցնելու համար դա ուղղակի առիթ էր»,- ավելացրեց Գ.Սահակյանը:
ՀՀԿ խմբակցության ղեկավարի խոսքով' քաղաքական ամառը շատ ակտիվ էր, քանի որ քաղաքական ուժերը գնացին դիրքորոշումների հստակեցման' հաշվի առնելով այն հանգամանքը, որ առաջիկայում ընտրություններ են: