Ռ.Կիրակոսյան. «Կոալիցիա-ՀԱԿ երկխոսությունն ուժեղացնում է Հայաստանի դիրքերն արտաքին աշխարհում»
1 րոպեի ընթերցում
ԵՐԵՎԱՆ, 25 ՀՈՒԼԻՍԻ, ԱՐՄԵՆՊՐԵՍ: Ժամանակն է, որ Լեռնային Ղարաբաղի հարցում հայկական դիվանագիտությունն ավելի կոշտ դիրքորոշում որդեգրի: Այսօր լրագրողների հետ հանդիպման ժամանակ նման տեսակետ հայտնեց Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանը' անդրադառնալով վերջին շրջանում Լեռնային Ղարաբաղի հակամարտության կարգավորման գործընթացում տեղի ունեցող զարգացումներին:
Նրա խոսքով' բանակցային գործընթացում առաջիկայում բեկում չի լինի։
«Ադրբեջանի դիվանագիտական ռազմավարությունը չաշխատեց։ Նրանք մտածում էին Կազանում բարձր դիրք գրավել ու տեսնել, թե ինչ կշահեն այդ հանդիպումից, որից մեծ սպասելիքներ կային»,- նշեց Ռ.Կիրակոսյանը' ավելացնելով, որ ադրբեջանցիներն այդ առումով հաջողության չհասան, որովհետեւ Ադրբեջանը չկարողացավ կազանյան հանդիպմանը ճնշում գործադրել Մինսկի խմբի վրա։
Ռ.Կիրակոսյանն անդրադարձավ նաեւ ներքաղաքական խնդիրներին' նշելով, որ ՀԱԿ-իշխանություն երկխոսությունն ուժեղացնում է Հայաստանի դիրքերը նաեւ արտաքին աշխարհում:
Անդրադառնալով այն լուրերին, թե իբր Ռ.Կիրակոսյանը պատրաստվում էր դասախոսություններով հանդես գալ Թուրքիայի ԱԳ նախարարությունում, բանախոսը կտրականապես հերքեց դրանք' նշելով, որ դա առնվազն տարօրինակ կլիներ: