1 րոպեի ընթերցում
ԵՐԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ: Հայ ազգային կոնգրեսը չի ներկայացնում ամբողջ ընդդիմությունը: Այսօր լրագրողների հետ հանդիպման ժամանակ նման տեսակետ հայտնեց Ժողովրդական կուսակցության նախագահ Տիգրան Կարապետյանը' ավելացնելով, որ եթե ՀԱԿ-ը գնում է իշխանության հետ բանակցությունների, ապա նրա վրայից պետք է հանել «արմատական ընդդիմություն» պիտակը:
«ՀԱԿ-ն ընդդիմադիր ուժ է, որը փոխել է իր սկզբունքը' արմատականից դարձել կառուցողական»,- հայտարարեց Տ.Կարապետյանը:
ԺԿ նախագահը ցածր է գնահատում արտահերթ ընտրությունների հավանականությունը' նշելով, որ ՀԱԿ-ն այդ հարցը որպես անկյունաքարային խնդիր չի դնում, պարզապես խոսում է արտահերթ ընտրությունների մասին, որպեսզի որոշակիորեն լեգիտիմացնի իշխանության հետ բանակցությունները: «Այս բանակցությունները կուժեղացնեն եւ' իշխանությանը, եւ' ՀԱԿ-ին»,- կարծիք հայտնեց Տ.Կարապետյանը: