1 րոպեի ընթերցում
ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: Հայաստանում քաղաքական նոր մշակույթ է ձեւավորվում, ինչի վկայությունը քաղաքական երկխոսության առկայությունն է: Այսօր լրագրողների հետ հանդիպման ժամանակ նման տեսակետ հայտնեց ՀՀ Ազգային ժողովի ՀՀԿ խմբակցության պատգամավոր Համլետ Հարությունյանը' բնական համարելով, որ երկխոսության ընթացքում Հայ ազգային կոնգրեսը ներկայացնում է իր պահանջները, իսկ իշխանությունը ցուցաբերում իր վերաբերմունքը եւ նույնպես որոշ պահանջներ առաջ քաշում:
ՀԱԿ ներկայացուցիչ Գուրգեն Եզիազարյանն էլ կարծիք հայտնեց, որ երկրի խնդիրների մեծամասնության պատճառը չկարգավորված կապիտալիստական հարաբերություններն են, ինչի պատճառով էլ Հայաստանն արժանացավ «Forbes»-ի համապտասխան գնահատականին:
«Ոչ մեկը չի ժխտում' սկսած հանրապետության նախագահից, որ ունենք լրջագույն տնտեսական խնդիրներ, եւ ցանկանում ենք, որ մեր ժողովուրդը բարեկեցիկ ապրի, իսկ այդ ուղղությամբ բարեփոխումներ ձեռնարկվում են»,- շեշտեց Հ.Հարությունյանը' նշելով, որ «Forbes»-ը եւ նման կազմակերպություններ հաճախ աչքի են ընկնում տարբեր երկրների նկատմամբ կողմնակալ վերաբերմունքով: «Այդ գնահատականն ընդհանրապես արժանահավատ չեմ համարում»,- նշեց պատգամավորը: