2 րոպեի ընթերցում
ԳՅՈՒՄՐԻ, 10 ՄԱՅԻՍԻ, ԱՐՄԵՆՊՐԵՍ: Գերմանական «Կարմիր խաչ»-ի նախաձեռնությամբ Գյումրու «Երեխաների տուն»-ն այսօր ստացավ սահմանափակ կարողություններով երեխաների համար նախատեսված հատուկ միկրոավտոբուս: Ութ ուղեւորի համար նախատեսված ավտոբուսը հնարավորություն ունի հատուկ վերելակային սարքի միջոցով բարձրացնել եւ ավտոբուսի մեջ տեղադրել երկու անվասայլակ' առանց որեւէ դժվարության: Միկրոավտոբուսի բոլոր նստատեղերն ունեն հատուկ ամրագոտիներ:
Ինչպես «Արմենպրես»-ին տեղեկացրեց «Կարմիր խաչ»-ի Գերմանիայի գրասենյակի ներկայացուցիչ Քրիստանա Գայեվսկին, որը նաեւ Բեռլինի «Էլիզաբեթ Վայսկե» հաշմանդամների գիշերային կենտրոնի տնօրենն է, դեռ անցած տարվա հոկտեմբերին «Կարմիր խաչ»-ի Գերմանիայի գրասենյակի մի քանի անդամներով այցելել են Գյումրիում գործող տարբեր սոցիալական կառույցներ:
«Այցելելով Գյումրու «Երեխաների տուն»' մենք մտածեցինք, որ այս կառույցին առաջին հերթին անհրաժեշտ է այնպիսի մեքենա, որը սահմանփակ կարողություններով երեխաներին հնարավորություն կտա ավելի շարժուն լինել»,-նշեց Քրիստանա Գայեվսկին:
Ավելացնենք, որ ՀՀ Աշխատանքի եւ սոցիալական հարցերի նախարարության ենթակայության տակ գտնվող հանրապետական նշանակության մանկատունն ունի 1 օրականից մինչեւ 6 տարեկան 128 սան: Նրանք հանրապետության բոլոր մարզերից բերված սահմանափակ կարողություններ ունեցող երեխաներ են:
«Ընդհանրապես, այս մեքենան առաջին իսկ պահից մեզ անհրաժեշտ էր: Երեխաների տեղափոխումը Երեւան' վիրահատության, կամ այլ կազմակերպություններ, եւ ինչու չէ նաեւ զբոսանքի, դժվար էր, իսկ այս մեքենան հնարավորություն է տալիս երեխաներին ապահով սայլակով տեղափոխելու: Բացի այդ, այս մեքենան ունի նաեւ բոլոր նստատեղերում հատուկ ամրակապեր, որը մյուս երեխաների տեղափոխումը եւս ապահով է դարձնում: Այս մեքենայի հետ մենք ստացել ենք նաեւ սպասք եւ սպասքի հարմարանքներ սահմանափակ կարողություներով երեխաների համար»,-նշեց «Երեխաների տան» տնօրեն Ռուզան Ավագյանը: