ԱՊՀ երկրներում պաշտոնական տվյալներով բնակվում է մոտ 1,5 մլն հայ, ոչ պաշտոնական` շուրջ 3 մլն
2 րոպեի ընթերցում
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: ԱՊՀ երկրների հայ համայնքներում պաշտոնական տվյալներով մոտ 1,5 մլն հայ է բնակվում, ոչ պաշտոնական` ավելի քան 3 միլիոն: Այս մասին «Արմենպրես»- ին հայտնեց ՀՀ սփյուռքի նախարարության ԱՊՀ հայ համայնքների վարչության Ռուսաստանի, Ուկրաինայի, Բելառուսի եւ Մոլդովայի հայ համայնքների հետ կապերի բաժնի գլխավոր մասնագետ Վարդան Պետրոսյանը` նշելով, որ պաշտոնական տվյալներով 1,2 մլն-ը Ռուսաստանում է: Ոչ պաշտոնական տվյալներով Ռուսաստանի հայ համայնքը աշխարհում ամենամեծն է, իսկ ըստ պաշտոնական աղբյուրների` երկրորդն է ԱՄՆ-ից հետո, որտեղ բնակվում է 1,3 մլն հայ, ոչ պաշտոնական տվյալներով` 1,5 մլն: «ՌԴ-ում հայերի թիվը, համաձայն ոչ պաշտոնական աղբյուրների, 2,5 միլիոն է:
Դա պայմանավորված է մի քանի հանգամանքներով, մասնավորապես` քաղաքացիական կարգավիճակով»,-ասաց Վ. Պետրոսյանը` հավելելով, որ Ռուսաստանի Դաշնությունում բնակվող բազմաթիվ հայեր քաղաքացիություն չունեն եւ օգտվում են ժամանակավոր կեցության իրավունքից, իսկ դա մարդահամար անցկացնելիս չի գրանցվում: «Բացի դա՝ մարդահամարի ժամանակ ազգային պատկանելությունը շատ դեպքերում չի նշվում եւ հետեւաբար շատերն էլ չեն հաշվվում որպես հայեր»,-պարզաբանեց նա: Ամբողջ Սփյուռքում հաշվվում է մոտ 7 մլն հայ, որից միայն 1 մլն-ը` Եվրոպայի 35 երկրներում: Ըստ պաշտոնական տվյալների` Ուկրանիայում բնակվում է 200 հազ., Բելառուսում`10-15 հազար, եւ Մոլդովայում` 8 հազար հայ, իսկ ոչ պաշտոնական տվյալներով, համապատասխանաբար` 0,5 մլն, 30 հազար եւ 12 հազար: