Ռուսաստանի իշխանությունները կարտաքսեն Մոսկվայում Մոլդովայի դեսպանության աշխատակցին. Moldpres
3 րոպեի ընթերցում
Հոդվածը հրապարակվում է «Արմենպրես»-ի և Moldpres-ի միջև ստորագրված համաձայնագրի շրջանակում։
Ռուսաստանի իշխանությունները կարտաքսեն Մոլդովայի Հանրապետության դեսպանության աշխատակցին։ Ինչպես «Արմենպրես»-ը տեղեկանում է Moldpres-ից, այս մասին պաշտոնական նոտան հանձնվել է Մոսկվայում Մոլդովայի դեսպան Լիլիան Դարիին, որը կանչվել էր Ռուսաստանի արտաքին գործերի նախարարություն։
Մոլդովայի արտաքին գործերի նախարարության խոսնակ Տատյանա Բարակը հաստատել է տեղեկությունը։
Մոլդովայի Հանրապետության ԱԳՆ-ն հաստատում է, որ Ռուսաստանի Դաշնությունում Մոլդովայի դեսպանը կանչվել է Արտաքին գործերի նախարարություն, ինչպես նաև հաստատում է Մոսկվայում Մոլդովայի դիվանագիտական ներկայացուցչության աշխատակցին արտաքսելու Ռուսաստանի իշխանությունների որոշումը», - ընդգծել է Տատյանա Բարակը։
Ըստ ռուսական կողմի՝ սա պատասխան քայլ է Քիշնևի իշխանությունների կողմից ռուս դիվանագետի արտաքսման որոշման։ Այդ որոշումը կայացվել էր այն բանից հետո, երբ Մոլդովայի տարածքում հայտնաբերվել էին պայթուցիկ նյութեր տեղափոխող անօդաչու թռչող սարքի բեկորներ։
2026 թ. հոկտեմբերի 23-ին Արտաքին գործերի նախարարությունը հայտարարել էր, որ Մոլդովայում Ռուսաստանի դեսպանատան աշխատակիցներից մեկը կհայտարարվի «պերսոնա նոն գրատա» (անցանկալի անձ)՝ որպես պատասխան քայլ՝ կապված ազգային օդային տարածքի խախտման և Տելենեշտիի շրջանի Քիշտելնիցա գյուղում տեղի ունեցած միջադեպի հետ։ Այդ միջադեպի ժամանակ պայթուցիկ նյութերով բեռնված անօդաչու թռչող սարքն ընկել էր բնակելի տնից և էներգետիկ օբյեկտից մոտ 100 մետր հեռավորության վրա։
Նախարարությունն ընդգծել էր, որ միջադեպը Մոլդովայի Հանրապետության ինքնիշխանության և անվտանգության լուրջ խախտում է, ինչպես նաև ուղղակի սպառնալիք՝ քաղաքացիների անվտանգության համար։ Գերատեսչությունը գործողությունները որակել էր «անընդունելի»՝ շեշտելով, որ դրանք «ևս մեկ անգամ ցույց են տալիս այն ռիսկերը, որոնք առաջանում են Ռուսաստանի կողմից Ուկրաինայի դեմ սանձազերծված ագրեսիվ պատերազմի հետևանքով»։
Մոլդովայի իշխանությունները նաև կոչ են արել Ռուսաստանի Դաշնությանը դադարեցնել այն գործողությունները, որոնք վտանգում են տարածաշրջանային անվտանգությունն ու մարդկանց կյանքը։