Դավիթ Թադևոսյանը Քիշնևում մասնակցում է թվային կապակցվածության զարգացմանը նվիրված նախարարական հանդիպմանը
2 րոպեի ընթերցում
Հայաստանի Հանրապետության բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանը նոյեմբերի 9-10-ը Մոլդովայի մայրաքաղաք Քիշնևում մասնակցում է ԵՄ «Կապակցվածության օրակարգի հարթակ» միջոցառման շրջանակում անցկացվող թվային հարցերով նախարարական առաջին հանդիպմանը։ Նախարարին ուղեկցում է նախարարի տեղակալ Գևորգ Մանթաշյանը։
Ինչպես «Արմենպրես»-ը տեղեկանում է գերատեսչության տարածած հաղորդագրությունից, հանդիպման նպատակն է համախմբել Եվրոպական միության անդամ պետությունների, Սևծովյան տարածաշրջանի, Հարավային Կովկասի, Թուրքիայի և Կենտրոնական Ասիայի՝ թվային փոխակերպման հարցերով պատասխանատու նախարարներին, ինչպես նաև միջազգային ֆինանսական կազմակերպությունների և մասնավոր հատվածի ներկայացուցիչներին՝ քննարկելու տարածաշրջանային թվային կապակցվածության զարգացման հեռանկարները, համագործակցության հնարավորություններն ու համատեղ նախաձեռնությունները։
Միջոցառման շրջանակում անցկացվել են բարձր մակարդակի քննարկումներ՝ Տրանսկասպյան միջանցքի երկայնքով թվային կապակցվածության զարգացման և տարածաշրջանային համագործակցության ամրապնդման վերաբերյալ։
Քննարկումների օրակարգում ընդգրկված են ենթակառուցվածքային և կարգավորիչ կապակցվածության, տարածաշրջանային թվային ենթակառուցվածքների զարգացման, անվտանգ թվային կապի ապահովման, արհեստական բանականության էկոհամակարգերի զարգացման և վստահելի թվային ենթակառուցվածքների ձևավորման հարցերը։
Կայացել են նաև նախարարական և «Արհեստական բանականություն» խորագրով պանելային քննարկումներ, որոնց ընթացքում անդրադարձ է կատարվել տարածաշրջանային համագործակցության հնարավորություններին և թվային ոլորտի զարգացման առաջնահերթություններին։
Թվային հարցերով նախարարական առաջին հանդիպումը կազմակերպվել է Եվրոպական հանձնաժողովի և Մոլդովայի տնտեսական զարգացման և թվայնացման նախարարության համագործակցությամբ։