1 րոպեի ընթերցում
Ղազախստանի ազգային անվտանգության կոմիտեն երկրի արևմուտքում գտնվող Ատիրաու քաղաքում ձերբակալել է 10 մարդու՝ ծայրահեղական խմբի ստեղծման, ղեկավարման և դրա գործունեությանը մասնակցելու, ինչպես նաև ահաբեկչության քարոզչության ու կրոնական թշնամանք հրահրելու կասկածանքով։ «Արմենպրես»-ի փոխանցմամբ՝ այս մասին նոյեմբերի 2-ին հայտնել է Ղազախստանի ազգային անվտանգության կոմիտեի մամուլի ծառայությունը։ Ձերբակալությունները կատարվել են հոկտեմբերի 30-ին՝ դատախազության մարմինների համակարգմամբ իրականացվող նախաքննության շրջանակում։
«Քննության վարկածով՝ հանցավոր խմբի անդամները նպատակ են հետապնդել բռնի փոխելու Ղազախստանի արևմտյան տարածաշրջանում սահմանադրական կարգի հիմքերը»,– ասված է հաղորդագրությունում։
Կոմիտեի տվյալներով՝ կասկածյալների բնակության վայրերում կատարված խուզարկություններով առգրավվել են հրազեն, թմրանյութեր, կրոնական պարագաներ, գրականություն և այլ իրեղեն ապացույցներ։
Դադարեցվել է նաև երեխաների ու դեռահասների համար խմբի անդամների ստեղծած երեք ընդհատակյա ուսումնական կենտրոնների գործունեությունը։