1 րոպեի ընթերցում
Դնեպրի երկաթուղային կայարանին առավոտյան ռուսական ուժերի հասցրած հարվածների հետևանքով զոհվել է 14 մարդ, 13 մարդ վիրավորվել է։ Նրանցից չորսի վիճակը ծանր է։ «Արմենպրես»-ի փոխանցմամբ՝ այս մասին հաղորդում է BBC-ի ռուսական ծառայությունը՝ վկայակոչելով տեղի իշխանություններին։
Կայարանին հարվածը հասցվել է ռեակտիվ անօդաչու թռչող սարքով։ Հարվածի տակ է հայտնվել հարթակը, որտեղ կանգնած է եղել Դնեպր-Զապորոժիե գնացքը։
Բացի այդ, հրթիռային հարվածի տակ է հայտնվել Չեռնիգովը, որի հետևանքով զոհվել է 15-ամյա երկու աղջիկ։ 15 մարդ վիրավորվել է։ Վնասվել են բնակելի տներ, խանութներ, մեքենաներ։
Կրեմենչուգում երկու մարդ է զոհվել բնակելի շենքին ԱԹՍ-ի հարվածի հետևանքով, 11 մարդ վիրավորվել է։ Եվս մեկ զոհ, երեք վիրավոր կա Զապորոժիեի մարզում։
Ավելի վաղ ռուսական կողմը հաղորդել էր, որ գիշերվա ընթացքում երկրի տարբեր մարզերում խոցվել է ավելի քան 1200 անօդաչու թռչող սարք, որոնցից 613-ն արձակվել է Մոսկվայի ուղղությամբ։