Ռուբիոն հերքել է Ուկրաինայի մեղադրանքները՝ կապված ԱՄՆ հետախուզական տվյալների փոխանցման սահմանափակումների հետ

ԱՄՆ պետքարտուղար Մարկո Ռուբիոն հայտարարել է, որ ամերիկացի զինվորականները Կիևին օդային հարձակումների վերաբերյալ նախազգուշացումներ են տրամադրում նախկին ծավալով։ «Արմենպրես»-ի փոխանցմամբ՝ այս մասին նա ասել է Հնդկաստանում լրագրողների հետ զրույցում, որի տեսանյութը տարածել է Fox News-ը։

«Չի եղել որևէ միտումնավոր քաղաքական հրահանգ՝ վնասելու Ուկրաինային։ Դա ճիշտ չէ։ Տեղեկություններ կան, որ կարծում եմ՝ հոկտեմբերի 13-ին և 18-ին եղել են արևահարվածներ, որոնց մասին տեղեկացում չի եղել։ Դա չի եղել այն պատճառով, որ Ամերիկան տեղեկատվություն չի տրամադրել», - ասել է Ռուբիոն։

Նա հիշատակել է Ուկրաինայի նախագահի խորհրդականի հարցազրույցը, որում վերջինս ասել էր, որ երկրում մարդիկ զոհվել են, որովհետև ԱՄՆ-ն հրաժարվում է հետախուզական տվյալներ տրամադրել։

«Սա սկանդալային է, սա վրդովեցուցիչ է, սա պարզապես ճիշտ չէ», - հայտարարել է Ռուբիոն՝ հավելելով, որ հնարավոր է՝ խնդիրը ներքին բնույթ է կրել և կապված է եղել տեղեկատվությունն ընդունելու, համակարգելու ու դրան արձագանքելու նրանց կարողության հետ։

«Դա հնարավոր է, և մենք ուսումնասիրում ենք այդ հարցը.... Մենք նրանց նույն նախազգուշացումներն ենք տրամադրում հիմա, ինչ նախկինում», - նշել է ԱՄՆ պետքարտուղարը։

Նա նաև հայտարարել է, որ ԱՄՆ իշխանությունները «միտումնավոր կերպով չեն մերժել» ուկրաինական կողմի հարցումները զենիթային համակարգերի հրթիռների մատակարարման վերաբերյալ։ Ռուբիոյի խոսքով՝ բազմաթիվ երկրներ են ցանկանում կալանիչ հրթիռներ, այդ թվում՝ Սաուդյան Արաբիան, Իսրայելը, և այդ հրթիռներն անհրաժեշտ են նաև ԱՄՆ-ին՝ սեփական ռազմական օբյեկտների պաշտպանության համար։  

Պետքարտուղարը նաև նշել է, որ ԱՄՆ նախագահը հիասթափված է ռուս-ուկրաինական հակամարտության կարգավորման հարցում առաջընթացի բացակայությունից։

Ռուբիոն նաև ընդունել է, որ ԱՄՆ-ի և Ուկրաինայի միջև կա լուրջ լարվածություն, այդ պատճառով էլ ինքը հոկտեմբերի 20-ին ավելի վաղ զրուցել է Ուկրաինայի նախագահ Վոլոդիմիր Զելենսկու հետ։