2 րոպեի ընթերցում
Լիտվայի Սեյմը (խորհրդարանը) քվեարկել է երկրի տարածքում միջուկային զենքի տեղակայման արգելքից հրաժարվելու օգտին։ Որոշումն ուժի մեջ մտնելու համար անհրաժեշտ է երկրորդ քվեարկությունը երեք ամիս հետո։ «Արմենպրես»-ի փոխանցմամբ՝ այս մասին հաղորդում է ՏԱՍՍ գործակալությունը:
Երկրում միջուկային զենքի տեղակայումն արգելող սահմանադրության համապատասխան հոդվածի չեղարկման օգտին լիագումար նիստում քվեարկել է 106 պատգամավոր, 6 պատգամավոր ձեռնպահ է մնացել, 18-ը քվեարկել է դեմ։
«Միջուկային զենքի տեղակայման արգելքից հրաժարումը վերացնում է անվտանգության ոլորտում իրավաբանական սահմանափակումները, որոնք մեզ տարբերում էին ԵՄ-ի և ՆԱՏՕ-ի մյուս երկրներից», - հայտարարել է Սեյմի խոսնակ Յուոզաս Օլեկասը։
Սեյմի որոշումը նախատեսում է, որ Սահմանադրությունից կհանվի 137-րդ հոդվածը, որն արգելում է զանգվածային ոչնչացման զենքի, այդ թվում՝ միջուկային զենքի տեղակայումը Լիտվայի տարածքում։ Նույն հոդվածն արգելում է նաև օտարերկրյա ռազմակայանների առկայությունը։ Վիլնյուսն այժմ ձգտում է հասնել նրան, որ հանրապետությունում նման ռազմակայան տեղակայի Միացյալ Նահանգները։
Սեյմը պետք է սահմանադրության փոփոխության օգտին քվեարկի երկու անգամ՝ եռամսյա ընդմիջմամբ։ Նորամուծությանը պետք է հավանություն տա որակավոր մեծամասնությունը՝ 94 պատգամավոր 141-ից։ Երկրորդ քվեարկությունը նախատեսված է հունվարի 12-ին: