Շվեյցարիայի նախագահը հայտարարել է հրաժարականի մասին

Շվեյցարիայի նախագահ Գի Պարմելենը մամուլի ասուլիսի ժամանակ հայտարարել է, որ գործընկերներին տեղեկացրել է 2026 թվականի վերջին Դաշնային խորհրդի կազմից հեռանալու իր մտադրության մասին՝ հավելելով, որ այդ որոշումը կայացրել է՝ առաջնորդվելով երկրի լավագույն շահերով։ «Արմենպրես»-ի փոխանցմամբ՝ այս մասին հաղորդում է ավստրիական Baha Breaking News պարբերականը։

Պարմելենը, որը նաև զբաղեցնում է երկրի էկոնոմիկայի նախարարի պաշտոնը, հերքել է առողջական խնդիրների պատճառով պաշտոնը թողնելու մասին լուրերը՝ պնդելով, որ, միևնույն է, չէր մնա իր խորհրդարանական մանդատի ավարտից (որը նախատեսված էր 2027 թվականի աշնանը) ավելի երկար ժամկետով։ Պատասխանելով իրեն փոխարինողների վերաբերյալ հարցին՝ նա նշել է, որ չի միջամտելու նրանց ընտրության գործընթացին։

Աջակողմյան «Շվեյցարիայի ժողովրդական կուսակցության» անդամ Պարմելենը Շվեյցարիայի կառավարության կազմում ընդգրկվել է դեռևս 2016 թվականին։ Նա երկրի նախագահի պաշտոնը զբաղեցրել է 2021 և 2026 թվականներին։ Շվեյցարիայում Դաշնային խորհրդի յոթ անդամները ռոտացիոն կարգով մեկական տարի ժամկետով ստանձնում են նախագահի պաշտոնը։